Qazaqstannyń depozitterge kepildik berý qory (QDKBQ) teńge depozitteri boiynsha 2020 jyldyń tamyzyna qatysty usynylǵan eń joǵary mólsherlemeni bekitti, dep habarlaidy "Ult aqparat" qordyń baspasóz qyzmetine silteme jasap.
26 maýsymda QDKBQ Jeke tulǵalardyń jańadan tartylǵan depozitteri boiynsha eń joǵary syiaqy mólsherlemeleriniń mólsherin anyqtaý jáne bekitý ádistemesine ózgerister engizdi. Soǵan sáikes depozitter boiynsha syiaqylardyń joǵarǵy shegi bekitildi. Ol bazalyq mólsherleme men spredtiń qosyndy somasyna teń. Bul ózgerister depozitterge kepildik berý júiesine qatysýshy banktermen kelisildi.
Jańa engizilim bankterdiń qarjylyq ornyqtylyǵyn saqtaý maqsatynda júielik táýekelderdi tómendetýge baǵyttalǵan. Bul bankterdiń qor jinaý quny men paiyzdyq shyǵyndarynyń shekten tys ósýine jol bermei, olardy ońtaily deńgeide ustap turýǵa múmkindik beredi. Paiyzdyq shyǵyndardyń shekten tys ósýi nesie boiynsha paiyzdyq mólsherlemelerdiń joǵarylaýyna ákep soǵatyny belgili.
Sonymen depozit boiynsha eń joǵary syiaqy mólsherlemesiniń joǵarǵy shegi 14,5 paiyz (bazalyq mólsherleme pliýs 5 p. t.) deńgeiinde bekitildi. Bul depozitterdiń joǵary tabysyn qamtamasyz etýge múmkindik beredi.
Atap ótý kerek, bankter qarjylyq jáne ekonomikalyq jaǵdailarǵa baǵa bere otyryp, depozitter boiynsha mólsherlemelerdi retteý múmkindigine ie. Eger ortasha ólshemdi naryqtyq mólsherlemelerdi eskere otyryp eseptelgen eń joǵary syiaqy mólsherlemesi bekitilgen shekten joǵary bolsa, usynylǵan eń joǵary mólsherleme retinde osy bekitilgen shektiń máni qabyldanady.
Tamyzda 12 jáne 24 aiǵa arnalǵan jinaq salymdardyń eń joǵary mólsherlemeleri tolyqtyrýǵa bolatyn túri boiynsha – 12,4 jáne 12,3 paiyzdy, al tolyqtyrylmaityn túri boiynsha – 14,5 jáne 14,3 paiyzdy quraidy.
12 ailyq merzimdi salymdar boiynsha usynylǵan eń joǵary mólsherlemeler burynǵy deńgeiinde qaldy. Eske salamyz, olar ortasha ólshemdi naryqtyq syiaqy mólsherlemeleri negizinde esepteledi. Al 24 ailyq merzimdi salymdar boiynsha mólsherlemeler tómendep, tolyqtyrý quqyǵy bar túri boiynsha – 8,7 paiyz, al tolyqtyrý quqyǵy joq túri boiynsha – 9,5 paiyz bolady.
Bul depozitterdiń shekti syiqylary da ortasha ólshemdi naryqtyq syiaqy mólsherlemeleri negizinde esepteledi. Osy depozitter boiynsha mólsherlemelerdiń eleýli túrde tómendeýi bankter tarapynan oǵan degen qyzyǵýshylyqtyń tómendigin jáne ekonomikalyq turǵydan mólsherlemeni joǵarylatýdyń orynsyz ekendigin kórsetedi.
Tamyz aiynda merzimsiz jáne qysqa merzimdi teńgelik depozitter boiynsha usynylatyn eń joǵary mólsherlemelerdiń tómendeýi – Qordyń aǵymdaǵy jyldyń mamyr aiynda mólsherlemelerdi birtindep tómendetýdi qolǵa alǵan sharasynyń sońǵy kezeńi. Eske salamyz,
Qor buǵan deiin tómendetilgen bazalyq mólsherlemege qatysty spredti joǵarylatyp, keiinnen birtindep tómendetý týraly sheshim qabyldaǵan bolatyn. Bul shara tómendetilgen bazalyq mólsherleme depozitterdiń osy sanatyna jáne jalpy depozit naryǵyna keri áser etpeýi úshin qajet boldy.
Tamyz aiynda teńgedegi merzimsiz depozitter boiynsha maksimaldy mólsherlemeler jylyna 9,5 paiyz deńgeiinde bekitildi. Bul QR Ulttyq Bankiniń bazalyq mólsherlemesine sáikes keledi.
Eske salamyz, bazalyq mólsherleme aqshanyń qysqa merzim ishindegi qunyn bildiredi jáne ishki jáne syrtqy ekonomikalyq faktorlardy eskere otyryp bekitiledi. Tolyqtyrý quqyǵy bar, 3 jáne 6 aiǵa arnalǵan merzimdi depozitter boiynsha shekti mólsherlemeler – 9,5 paiyzdy, tolyqtyrylmaityn túri boiynsha – 10,0 paiyzdy quraidy.
Osy merzimdegi jinaq salymdardyń tolyqtyrylatyn túrine qatysty shekti mólsherlemeler – 10,5 paiyzdy, tolyqtyrylmaityn túri boiynsha – 11,0 paiyz bolady.
