Temirtaý qalasyn jylýmen jabdyqtaýda tapshylyq oryn alýy múmkin. Bul týraly Úkimet otyrysynda QR Energetika ministri Maǵzum Myrzaǵaliev aitty, dep habarlaidy QazAqparat.
«Qaraǵandy oblysynyń ákimdigine Atomdyq jáne energetikalyq qadaǵalaý men baqylaý komitetimen birlesip, Temirtaý qalasynda kúzgi-qysqy kezeńniń ótýin erekshe baqylaýda ustaý qajet. «ArselorMittal Temirtaý» kásipornynyń ekinshi jylytý elektr ortalyǵyndaǵy negizgi jabdyqtyń tehnikalyq nashar jaǵdaiy jáne jóndeýdiń tómen qarqyny Temirtaý qalasynyń jylýmen jabdyqtaý tapshylyǵyna ákelýi múmkin», - dedi ministr.
Sonymen qatar ol «BASSEL GROUP LLS» kásipornynyń GRES-1 elektr stantsiiasyndaǵy jumysy erekshe nazar aýdarýdy talap etetinin aitty.
Óitkeni, osy jyldyń basynan bastap atalǵan elektr stantsiiasy tolyq toqtatylyp, 4 apattyq ajyratý oryn alǵan.
«Energetika ministrligine Qaraǵandy oblysy Shet aýdanynyń tutynýshylaryna elektr energiiasyn berýdi jáne taratýdy júzege asyratyn «Shet energo» kásiporny qyzmetine halyqtan kóptegen shaǵym túsýde. Ministrlik «Shet energo» kásipornyna qatysty baqylaý jumysynyń nátijesi boiynsha óz quzyreti sheginde tiisti is-sharalar qabyldady. Budan basqa, Ulttyq ekonomika ministrligine jáne Qaraǵandy oblysynyń prokýratýrasyna tabiǵi monopoliialar sýbektisi – «Shet Energo» kásipornyna den qoiý is-sharalaryn qabyldaý jóninde hat joldandy», - dedi Maǵzum Myrzaǵaliev.
