Qazan aiynan bastap, temeki ónimderi mindetti túrde tańbalanýy tiis, dep habarlaidy "Ult aqparat".
QR Qarjy ministrligi Memlekettik kirister komiteti baspasóz qyzmetiniń málimetine qaraǵanda, bul sharalar naryqtyń ashyqtyǵy men turǵyndardy jasandy ónimderden, ásirese, densaýlyqqa ziian kontrafaktiden saqtaýǵa arnalyp otyr.
Sandyq tańbalaýdy engizýdiń birinshi kezeńiniń aiasynda, 2020 jyldyń 1 qazanynan bastap temeki ónimderin satý jańa sharttarda júzege asyrylady, oǵan sáikes temeki ónimderi mindetti túrde tańbalanýy tiis. Temeki óniminiń kez kelgen ainalymynda shyǵarylǵan merzimnen bastap 2D-SKANER qoldanylýy tiis, atalmysh skaner qajetti málimetterdi oqýǵa jáne olardy fiskaldy derekter operatorlaryna berýge múmkindik beredi. Sonymen birge, eger óndirýshi óz jumysynda 2D-SKANER qoldanatyn bolsa, onyń jańasyn satyp alýdyń qajeti joq.
Tańbalaý – taýardaǵy arnaiy shifrlanǵan belgi, ol óndirýshi týraly tolyq aqparat, seriialyq nómir jáne buzýdan saqtaityn kodtan turady. Taýarlardy tańbalaýda DataMatrix biregei kody paidalanylady. Ol biregei, qaitalanbaidy jáne ony buzý múmkin emes. Bul shynaiy óndirýshiniń taýar sapasyna kepildigin qamtamasyz etedi. DataMatrix temeki qorabynyń syrtyna ornalastyrylady jáne bul kodtyń 30 paiyzǵa deiin buzylýy anyqtalsa da, 2D-SKANER osyndai kodty oqi alady.
«Kásipkerlerge yńǵaily bolýy úshin Sandyq tańbalaýdy engizý men taýarlardy qadaǵalaý jónindegi ulttyq operator naryqta satylatyn skanerlerdi testileýden ótkizip, sandyq tańbamen qoldaný talaptaryna sai keletin qurylǵylardy tańdap aldy», - delingen habarlamada.
