Tsifrlyq damý, innovatsiialar jáne aeroǵarysh ónerkásibi ministrliginiń telekommýnikatsiia komitetiniń tóraǵasy Vitalii Iaroshenko uialy bailanys qyzmetiniń úzilý sebebin atady, dep habarlaidy QazAqparat.
«Shyntýaitynda biz telefonnyń IMEI-kodynyń telefon nómirine bekitilgenin tekserý qyzmetin iske qostyq. Sonymen birge, belgili bir abonentke tirkelgen abonenttik nómirlerdiń sanyn anyqtaý qyzmeti qosyldy. Qazir azamattar bul qyzmetti jappai paidalana bastaǵannan keiin kóp adamdar ózine on myńdaǵan nómirdiń tirkelip turǵanyn anyqtady. Tipti, bir áieldiń atyna 51 myń nómirdiń tirkelgeni anyqtaldy. Tiisinshe ol uialy bailanys keńseleriniń birine barady da, sol 51 myń nómirdiń iesi retinde operatorǵa ol nómirdiń barlyǵyn óshirip, tek bireýin qaldyrǵysy keletini jaily ótinish jazady. Al 51 myń nómirdiń ishindegi kóp bóligin basqa adamdar paidalandy ǵoi. Tiisinshe, ol nómirlerdiń barlyǵy da óshedi», - dedi komitet tóraǵasy.
Onyń aitýynsha, búgingi kúni elimizde durys tirkelmegen 2 mln abonenttik nómir bar. Iaǵni azamattar óz atyna tirkelmegen nómirlerdi paidalanyp júr.
«Bireýdiń nómirin ustap júrgen adamdar qandai qaýippen betpe-bet kelýi múmkin? Eger ol bireýdiń nómirin ustap júrse, ony iesi op-ońai buǵattai alady nemese sol nómirdiń aqshasyn ózinikine aýdaryp ala alady. Nómirdiń shynaiy iesi ol abonenttiń kimge, qashan qońyraý shalǵanyn anyqtaýyna múmkindik bar», - dedi Vitalii Iaroshenko.
Komitet tóraǵasynyń aitýynsha, operatorlarǵa durys tirkelgen nómirlerge ǵana qyzmet kórsetýdi mindetteitin normamen jumys júrgizý mindeti 2019 jyldyń 1 qańtarynan bastap qoiylǵan.
«Esterińizde bolsa, byltyr jyl boiy túsindirý jumystaryn júrgizgen bolatynbyz. Sol kezde telefon nómirlerin tirkeý týraly eskertýler jasaldy. Sebebi, 2019 jyldyń 1 qańtarynan bastap sim-kartany joǵaltyp qana qoimai, telefonǵa avtomatty túrde tirkelmegen sim-karta bekitilip ketedi. Tiisinshe, bekitilgen málimetterdiń barlyǵy IMEI-kodtardyń málimetter bazasyna kelip tústi. Operatorlar telefonyńyzǵa qyzmet kórsetý kezinde málimetter bazasyndaǵy aqparatty telefonyńyzdaǵy málimetpen salystyrady. Sáikessizdik anyqtalsa, operator mundai qurylǵyǵa qyzmet kórsetýdi toqtatady», - dedi ol.
Eske sala ketsek, buǵan deiin Kcell baspasóz qyzmetiniń basshysy Oljas Bibanov uialy bailanys qyzmetiniń úzilýi jaily túsinik bergen bolatyn.
