«Qazaqstan» teleradiokorporatsiiasynyń quramyna kiretin «Qazaqstan», «Qazsport», «Balapan», «Tamasha Tv» jáne aimaqtyq telearnalar «Naýryz merekesine tartý» daiyndap jatyr, dep habarlaidy QazAqparat tilshisi.
«21 naýryzdan bastap úsh kún qatarynan adamzat tarihyndaǵy jylqynyń róli men Ortalyq Aziia dalalaryndaǵy jylqynyń shyǵý tegi týraly baiandaityn halyqaralyq «Equus: Jylqy tarihy» atty derekti trilogiianyń tusaýkeseri bolady. Al naýryzdyń 22-si kúni ulttyq arna Túrkiia, Qyrǵyzstan, Ózbekstan sekildi baýyrlas memlekettermen halyqaralyq telekópir arqyly bailanys ornatyp, ár eldegi merekelik atmosferamen bólisip, sol elderdegi naýryz merekesin toilaý dástúri jaily siýjetter men arnaiy suhbattar usynatyn bolamyz. Sonymen qatar, mereke kúnderi «Kúnnen týǵan bala...», «Amal aishyqtary» sekildi derekti sipattaǵy arnaiy jobalar úsh kún qatarynan efirge shyǵady. Taǵy bir erekshe aita ketetin aqparat - biyl biz «Naýryz-dýman» atty arnaiy joba josparlap, efirge ázirledik. Uzaqtyǵy 2,30 saǵatqa sozylatyn jańa joba Naýryz merekesine orai kórermenderge arnaǵan úlken tartýymyz», - dedi «Qazaqstan» telearnasynyń direktory Erkin Muhamedjanov OKQ-da ótken «Naýryz merekesine tartý» atty baspasóz máslihatynda.
Al, «Qazsport» telearnasy meiram kúnderi tikelei efirde fýtboldan Qazaqstan Ulttyq quramasynyń Eýropa chempionatyna irikteý oiyndaryn, birqatar qyzyqty baǵdarlamalar, derekti filmder men sport sańlaqtarynyń suhbattaryn kórsetetin bolady.
Arna basshysy Pavel Tsybýlinniń aitýynsha, kórermender 21 naýryz kúni HHIH qysqy Ýniversiada oiyndarynyń qola júldegeri Janbota Aldabergenniń suhbatyn, odan bólek birneshe derekti filmder, atap aitqanda aty ańyzǵa ainalǵan qazaq qaqpashysy Quralbek Ordabaev jaiynda - «Qazaqtyń №1 qaqpashasy», qazaq boksynyń damýyna úlken úles qosqan jattyqtyrýshy Myrzaǵali Aitjanov týraly «Bolmysy bólek bapker», 22 naýryzda talantty bylǵary qolǵap sheberi, 2005 jylǵy álem chempiony Erdos Jańabergenov jaiynda «Daraboz», halyqaralyq «Atlant» festivaliniń jeńimpazy atanǵan «Istoriia malenkoi rýsalki» derekti filmderin tamashalai alady.
Kishkentai kórermenderge arnalǵan «balapan» telearnasy osy kóktemgi telemaýsymda kórermen nazaryna barlyǵy 22 joba usynady. Onyń ishinde 6-aýy ishki ónim, al 10-y sheteldik úzdik animatsiialar men derekti filmder toptamasy, 3 telehikaia jáne 3 You Tube-qa arnalǵan jobalar.
«Biyl balalar arnasynda tuńǵysh ret tańǵy baǵdarlama jaryqqa shyqty. Oiyn-saýyq jáne aqparattyq baǵyttaǵy «Tańjaryq» habaryn kishkentai kórermender senbi jáne jeksenbi kúnderi tamashalai alady. Al «Balamen suhbat» baǵdarlamasynda balalar elimizge belgili, ómiri men eńbek joly urpaqqa úlgi bolarlyq tulǵalarmen áńgime-dúken túrinde suhbat qurady», - deidi «Balapan» telearnasynyń direktory Maqpal Jumabai.
Byltyrdan beri habar tarata bastaǵan «Tamasha tv» arnasynyń direktory Esen Eleýken de birneshe jańalyqtarymen bólisti. Onyń aitýynsha, jańa maýsym aiasynda biyl arna kórermenderge 14 joba tartý etpek.
«Alǵashqy 8 joba naýryz aiynda shyqsa, qalǵan 6 jobany sáýirge josparlap otyrmyz. Olardyń barlyǵy derlik jańadan shyǵyp jatqan baǵdarlamalar, árine ázilge qatysty. Sondai-aq, oiyn-saýyqtyq baǵdarlamalar da bar. Eń basty úlken jobalarymyzdyń biri «Tamasha Club» ázilge qatysy bar jastardyń ártúrli obrazdaǵy qysqasha qoiylymdardan quralǵan sketch-shoý. «Bir ǵanibet» jobasyn da erekshe atap ótkim keledi, bizdiń belgili aǵa-ápkelerimiz ózderiniń basynan ótken ázilge toly qyzyqty oqiǵalarymen bólisedi. Sondai-aq, jalpy qazaq satirasyna, qazaq áziline, qazaq qaljyńyna qatysty ómirden ótken jandarǵa arnalǵan «Ázil-Dastan» jobasy shyǵatyn bolady. Bul jobany tanymal satirik - Kópen Ámirbek júrgizedi. Al, «Taýyp kór» tanymdyq baǵdarlamasyna qarapaiym adamdar qatysady. Olar ózderine berilgen 4-5 tapsyrma arqyly kimmen sóilesip otyrǵanyn taýyp alýǵa tyrysatyn bolady», - deidi Esen Eleýken.
