«Habar» telearnasynda jastar pikir talastyratyn baǵdarlama ashylmaq. Bul jaiynda QR Aqparat jáne qoǵamdyq damý ministrliginiń Etnosaralyq qatynastardy damytý komiteti tóraǵasynyń orynbasary Erkin Úisimbaev aitty, dep habarlaidy QazAqparat.
«Biz «Jarasym» respýblikalyq jastar uiymy bazasynda jas kóshbasshylardyń, Qazaqstan halqy Assambleiasy, etnomádeni birlestikter músheleriniń, tanymal blogerlerdiń, volonterlerdiń, qaiyrymdylyq uiymdary ókilderiniń, jýrnalister men memlekettik qyzmetshilerdiń qatysýymen jas býyndy tolǵandyratyn ózekti máselelerdi talqylaýǵa arnalǵan «Jalyndy jastar» pikirtalas alańyn qurýdy usyndyq», - dedi ol QHA depýtattyq tobynyń Assambleianyń «Jańǵyrý joly» respýblikalyq jastar qozǵalysy múshelerimen kezdesýi barysynda.
Onyń atap ótýinshe, bul bastamaǵa QR Aqparat jáne qoǵamdyq damý ministri Aida Balaeva qoldaý bildirgen.
«Habar» telearnasynda arnaýly baǵdarlama jasaý múmkindigin pysyqtaityn bolamyz», - dedi Erkin Úisimbaev.
