Biyl tehnikalyq jáne kásiptik bilim berýge memlekettik tapsyrys 45 myń orynǵa artyp, 125 myń tegin grant bólinedi. Bul týraly QR BǴM Tehnikalyq jáne kásiptik bilim departamentiniń direktory Nasymjan Ospanova málim etti, dep habarlaidy QazAqparat.
«Jastardy suranysqa ie mamandyqtar boiynsha tegin tehnikalyq jáne kásiptik bilimmen 100 paiyz qamtý úshin memlekettik tapsyrysty ulǵaitý kerek. Osy oraida biyl respýblikalyq biýdjet esebinen memlekettik tapsyrys 45 myń orynǵa artady. Sonymen qatar ákimdikter de memlekettik tapsyrys boiynsha 80 myń oryndy josparlap otyr. Jalpy kolledjderde tegin bilim alýǵa 125 myń oryn beriledi. Prezidenttiń tehnikalyq jáne kásiptik bilim berýdi qaita qaraýǵa qatysty tapsyrmasy barshamyzǵa aian», - dedi Nasymjan Ospanova Ortalyq kommýnikatsiialar qyzmeti alańynda ótken baspasóz máslihatynda.
Onyń aitýynsha, 2025 jylǵa deiin memlekettik tapsyrystyń 70 paiyzy tehnikalyq mamandyqtarǵa beriledi.
«Qazir ol kórsetkish 45 paiyzdy quraidy. Mamandyqtarǵa kelsek, metallýrgiia, IT, qurylys, injeneriia, mashina jasaý taǵy sol siiaqty. Búgingi tańda arnaiy komissiialar óńirlerde eńbek naryǵynda suranysqa ie mamandyqtardyń tizbesin jasaqtaýda. Nátijesinde kerek mamandyqtar boiynsha oryn sandaryn bekitedi. Biyl 30 sáýirden bastap bilim basqarmalary memlekettik tapsyrys bólingen mamandyqtar týraly aqparatty resmi saittarynda ornalastyrady», - deidi ol.
