Foto: QR Qorǵanys ministrligi
Qorǵanys ministri Rýslan Jaqsylyqov otbasyndaǵy zorlyq-zombylyqpen kúres máselesine qatysty pikir bildirdi, dep habarlaidy Kazinform.
«Tárbieniń negizi otbasydan bastalady, iaǵni ata-ana balasyna qalai qarasa, bala keiin ózgelerge de solai qaraidy. Jalpy, áielderge qol kóterý kez kelgen erkekke abyroi ákelmeidi. Tek álsizder ǵana áielderge qol kóteredi. Eń aldymen, er adam - óz memleketiniń de, otbasynyń da qorǵaýshysy. Biraq eger er adam áieline qol kóterse, onyń ne mán-maǵynasy bar?», - dedi Jaqsylyqov Parlament Májilisinde tilshiler suraǵyna jaýap bere otyryp.
Aita keteiik, qazir qoǵamda otbasyndaǵy zorlyq-zombylyq máselesi qyzý talqyǵa túsip jatyr. Osy oraida jaqynda Qazaqstan halqy Assambleiasynyń «Analar» keńesi tóraǵasynyń orynbasary Baian Ahatai otbasylyq kelispeýshiliktiń bárin turmystyq zorlyq-zombylyqqa jatqyzýǵa bolmaitynyn aitty.
Senat tóraǵasy Máýlen Áshimbaev otbasyndaǵy zorlyq-zombylyqty tek zańnamany ózgertýmen sheshýge bolmaitynyn málim etti.
Al Qazaqstan musylmandary dini basqarmasy shariǵat jáne pátýa bóliminiń mamany, teolog Elbek Tasbolatulynyń paiymynsha, otbasy máselesinde ulttyq tárbie jóninde keńes bere alatyn mamandar kerek.
