Oblystyq qoǵamdyq keńestiń densaýlyq saqtaý salasy boiynsha ekspertti jumysshy toby jýyqta Óskemen qalasyndaǵy dárihanalarǵa reid júrgizgen kezde tegin beriletin dári-dármekterdiń bar ekenin anyqtady. Sońǵy eki-úsh aida naýqastardyń jandy problemasyna ainalǵan bul túitkildiń ońdy sheshilgenin oblystyq densaýlyq saqtaý basqarmasynda da rastady.
-Qazir oblystyń barlyq dárihanalarynda balalar men eresekterge arnalǵan kepildendirilgen tegin meditsinalyq kómektiń kólemi sheńberindegi preparattar jetkilikti mólsherde qordalanǵan. Kezinde Densaýlyq saqtaý ministrligi bekitken 18 aýrý túrine qarsy 400-den astam túrli dári-dármektiń qory kelesi jyldyń qańtar-aqpan ailaryna deiin jetýge tiis, - dedi oblystyq densaýlyq saqtaý basqarmasy basshysynyń emdeý jumystary jónindegi orynbasary Raifa Safiollinova.
Oblystyq densaýlyq saqtaý basqarmasy ókilderiniń sózine qaraǵanda, jaz ailarynda tegin dári-dármekterdiń joǵalyp ketýi óz mindetterine jaýapsyz qaraǵan keibir tasymaldaýshylar men dárihanalar arasyndaǵy sot isterine qatysty oryn alǵan. Búginde bul olqylyqtar zań aiasynda tolyq sheshilgendikten, dispanserlik esepte turǵan jandar tegin dárilerdi ýchaskelik terapevtiń qaǵazymen belgilengen dárihanalardan ǵana ala alady.
- Kepildendirilgen tegin meditsinalyq kómektiń kólemi sheńberindegi preparattardy tegin bosatatyn dárihanalardyń tizimi barlyq emhanalarda bolýy kerek. Ondai qyzmet kórsetpeitin dárihanaǵa naýqas kelse, provizorlar túsindirip jatpastan, preparatty sata salady. Jýyqta oblys ortalyǵynda osyndai keleńsiz jaǵdai oryn aldy. Sol sebepti turǵyndar naqty emhanalardyń mekenjailaryn aldyn ala bilgenderi jón, - dep eskertti basshynyń emdeý jumystary jónindegi orynbasary.
Patsientterdiń ýaqytyn únemdeý jáne ýchaskelik terapevterge túsetin júktemeni azaitý maqsatynda óńirdegi emhanalarda birneshe jyldan beri medbikelerdiń kabineti jumys isteidi. Tek retsept alý úshin ǵana kelgen adamǵa medbikeler dári-dármekpen qamtamasyz etýdiń málimetter júiesi arqyly tegin dári alýǵa qaǵaz jazyp bere alady. Alaida, olar naýqasqa beriletin dáriniń mólsherin ózgerte almaidy.
Sheneýnikter sonymen qatar tegin dárini bosatý júiesindegi olqylyqtar jaiynda da aitty. Mysaly, naýqasqa berilgen preparat dárihanada joq bolyp shyqsa, provizor oǵan osy dárini almastyra alatyn basqa dárilik ónimdi bere almaidy. Ol úshin tutynýshy óz dárigerine qaita kelip, jańa retsept jazǵyzyp alýǵa májbúr. Sondai-aq, naýqastarǵa tegin dári-dármek tek negizgi dertin emdeý úshin ǵana bosatylady. Bir naýqasqa bazalyq terapiia úshin preparattardyń bir-eki túri ǵana jetkilikti bolǵandyqtan, mamandar tegin dári-dármek barlyǵyna jetýge tiis dep sendirdi.
Oblys turǵyndaryna oblystyq ákimdik janyndaǵy bailanys ortalyǵyna 8(7232)56-09-66 telefony arqyly habarlasyp, tegin meditsinalyq kómektiń kólemi sheńberindegi meditsinalyq preparattardy qaidan alýǵa bolatyny jóninde tolyq maǵlumat alýyna bolady.
Aina Eskenqyzy, "Didar" gazeti
