Ǵabit Músirepov atyndaǵy qazaq memlekettik akademiialyq balalar men jasóspirimder teatry indet qaýpinen saqtanyp, qiyn kezeńde túsinistik pen birlik tanytýǵa shaqyrdy. Teatr akterlery osyǵan orai videorolik túsirgen, dep habarlaidy "Ult aqparat".
«Dert kóp. Densaýlyq bireý», «Aýyryp em izdegenshe aýyrmaityn jol izde», «Bizdiń basty bailyǵymyz – ol myqty densaýlyǵymyz», «Dos-jaran aýyryp qalǵanda selsoq júrersiń, álekke aýrý salǵanda qadirin jannyń bilersiń», «Aýrý batpandap kirip, mysqyldap shyǵady» dep halyqqa úndeý tastaǵan teatr akterlary indet qaitadan órshitindei sipat tanytyp kele jatqanyn eskertti.
Áriptesteriniń sózin qoldaǵan teatr direktory Azamat Satybaldy úsh nárseniń, daýdyń, jaýdyń jáne qaitadan qozǵan aýrýdyń aldyn alý kerektigin aitty.
«Asa qadirli aǵaiyn! Qazaqta «aýyryp em izdegenshe aýyrmaityn jol izde» degen sóz bar. Aýrý aityp kelmeidi. Qazir elimizdiń basynda ótip jatqan indet bárimizge syn. Áiteýir aman-esen birinshisinen óttik. Iá, qiyndyqtar men qazalar boldy. Jaqyndarymyzdan aiyryldyq. Ol endi Allanyń ámiri. Eshkim qarsy kele almaidy. Dese de, «saqtansań saqtaidy» deidi atam qazaq. Al endi qazir jańalyqtardan pandemiianyń qaitadan kúshine engenin kórip jatyrsyzdar. Osy indetten aman-esen shyǵaiyq. Ol úshin saqtyq qana kerek. Kóp adam shoǵyrlanǵan jerge barmai, tipti ózińdi ǵana emes, ózgeni de aýyrtpaýyń kerek. Sol úshin árbir adam buǵan jaýapkershilikpen qaraýy tiis. Men barsha kórermendi, aǵaiyn-týysty, eldi, jurtty saqtanýǵa shaqyramyn. Saqtyq sharalaryn ustanyńyzdar. Birikkende, bir bolǵanda, bir jaǵadan bas, bir jeńnen qol shyǵarǵanda ǵana jeńemiz. Sol úshin barshańyzdy saqtyq sharalaryn saqtap, aman-esen bolýyńyzdy tileimin. Elimiz aman, jurtymyz tynysh bolǵai», - deidi Azamat Satybaldy.
Eske sala ketsek osydan birneshe kún buryn QR Prezidenti Qasym-Jomart Toqaev qazaqstandyqtardy karantin sharalaryn saqtaýǵa úndegen bolatyn.
«Kóptegen shet elderdegi koronavirýs indetiniń taralý jaǵdaiy alańdatarlyq. Barlyq jerde qatań sharalar, onyń ishinde, lokdaýn tártibi qaita qabyldanyp jatyr. Qazaqstandyqtardy Densaýlyq saqtaý ministrliginiń usynymdaryn ustanyp, karantin sharalaryn saqtaýǵa shaqyramyn», - dep jazdy Prezident Twitter-de.
