Tájikstandaǵy Faizabad aýdanynyń soty 25 jastaǵy Manora Abdýfattohtyń ólimin "sýitsid" dep atap, "óz-ózin óltirýge jetkizý" baby boiynsha qylmystyq is qozǵady. Bul týraly Azattyqtyń Tájik qyzmeti Ozodi habarlady.
Jas áieldiń 26 ret pyshaq suǵylǵan máiiti 22 maýsym kúni jaldamaly páterden tabylǵan.
Faizabad aýdany prokýratýrasyndaǵy derekkóz Ozodige sýitsid týraly qorytyndy saraptama nátijesi boiynsha jasalǵan dedi. Onyń sózinshe, ólim qylmystyq kodekstiń 109-baby 1-tarmaǵy boiynsha ("Óz-ózin óltirý") boiynsha tergelip jatyr.
"Is oqiǵa boiynsha qozǵalǵan. Eger kimde-kimniń ony óz-ózin óltirýge deiin jetkizgeni dáleldense, ol adam osy bap boiynsha jazaǵa tartylady. Qazir kúdiktiler bar, biraq olardyń eshqaisysyna aiyp taǵylǵan joq" dedi derekkóz.
Óz-ózin óltirdi degen qorytyndy marqum týystarynyń narazylyǵyn týdyrdy. 17 shilde kúni Tájikstannyń bas prokýratýrasy men ishki ister ministrligine jazǵan hatynda olar isti ádil tergeýdi surady.
Manoranyń ákesi Abdýfattoh Misokov qyzynyń óz-ózine 26 márte pyshaq suqqanyna senbeidi. Ol ólimniń durys tergelmei otyrǵanyn, saraptamany qaita ótkizýdi talap etkenin aitady. Onyń sózinshe, pyshaq izderi negizinen moiyn tusynan jáne qolynan baiqalǵan.
"Adam óz-ózine bir-eki márte pyshaq suqqanda, úrkip qalyp, toqtai salady. Manoranyń qoly men moiny tilingen, adam óz-ózin olai tile almaidy. Men tergeýdiń durys ótýin talap etip kóptegen mekemege aryzdandym" deidi ol.
Isti Faizabad aýdanynyń prokýratýrasy men politsiiasy tergep jatyr. Olar ázirge oqiǵa týraly resmi málimdeme jasamady, 26 ret pyshaq suǵylǵan ólimniń qalai sýitsid dep tanylǵanyn túsindirmedi.
Anasy Sharboný Manora sýitsid týraly eshqashan aitpady deidi. Onyń sózinshe, qyzy nekede baqytsyz bolǵan, al kúieýi "talaq" aitamyn dep qorqyta bergen.
Ozodi tilshileri Manoranyń kúieýiniń týystaryna habarlasyp kórdi, jaýap bolmady.
Manora kúieýiniń úiinen ketip, Faizabad aýdany ortalyǵyndaǵy shaǵyn páterge ornalasqan. Oqiǵa sodan birneshe kún ótken soń bolǵan. Qaiǵyly jaǵdai bolǵan sátte úsh bala páterdiń as bólmesinde otyrǵan. Kórshiler, eshqandai shý estimegen, biraq sol kúni páterge kúieýiniń týystary kirip jatqanyn kórgen, olardyń aty-jónin politsiiaǵa bergen.
Manora Faizabad turǵynymen 2015 jyly turmys qurǵan. Artynda úsh balasy qaldy. Úlkeni beste, kishkentaiy alty ailyq.
Sarapshylardyń sózinshe, Tájikstanda áielderdiń ólimi men sýitsidi kóbine turmystyq zombylyq saldarynan bolady.
