2 236 sottalýshyǵa, 11 310 probatsiiada turǵan adamǵa raqymshylyq jasalady. Bul týraly Májilistegi Úkimet saǵatynda QR Ishki ister ministri Erlan Turǵymbaev aitty, dep habarlaidy QazAqparat.
«Memleket basshysynyń tapsyrmasyna sáikes, Ishki ister ministrligi «Táýelsizdiktiń 30 jyldyǵyna bailanysty raqymshylyq jasaý týraly» Zań jobasyn ázirledi. Onyń maqsaty – onsha aýyr emes jáne aýyrlyǵy ortasha qylmys úshin jazadan bosatý, keibir aýyr jáne asa aýyr qylmystar úshin jazanyń merzimin qysqartý. Raqymshylyq - ardagerlerge, kámeletke tolmaǵandarǵa, jasy úlkenderge, 1-shi jáne 2-shi toptaǵy múgedekterge, sondai-aq qoǵamǵa qaýip tóndirmeitin adamdarǵa qoldanylady. Zań jobasy memlekettik organ ókilderimen, qoǵam qairatkerlerimen jáne sarapshylarmen talqylandy», - dedi Erlan Turǵymbaev.
Ministrdiń dereginshe, elimizde 64 mekeme men 16 tergeý izoliatorynda 34 myń adam bar. Onyń ishinde 30 myń azamatqa sot úkimi shyqqan. Qalǵan 4 myń adam tergeý men qamaýda. 93 paiyzy aýyr jáne asa aýyr qylmys jasaǵany úshin qamaýda otyr. 45 paiyzy – buǵan deiin birneshe ret sottalǵandar. Sonymen qatar 32 myń adam probatsiialyq baqylaýda tur.
«Joba boiynsha 2 236 sottalýshyǵa, 11 310 probatsiiada turǵan adamǵa raqymshylyq jasalady. Nátijesinde 1 myń adam qamaýdan bostandyqqa shyǵady. 3 818 adam probatsiialyq baqylaýdan bosatylady. 1 294 sottalýshyǵa, 7 492 probatsiiada turǵan adamǵa jaza merzimi qysqartylady. Sotqa deiingi tergeýdegi 5 myń is qysqarady. Qylmystyq kodekstiń 78-babyna sáikes, asa aýyr qylmys jasaǵan adamdarǵa raqymshylyq qarastyrylmaǵan», - dedi ol.
