Táýelsizdik aq bilektiń kúshimen, aq naizanyń ushymen ata-babalarymyzdyń egemendik úshin kúresimen ǵasyrlarǵa ulasqan asyl armanyna jetken kún. Táýelsizdik kúni – keńdiginen ushqan qustyń qanaty talǵan, júgirgen tulpardyń tuiaǵy tozǵan ulanǵaiyr jerimiz – Uly dala elinde Táýelsiz memleket qurylǵanyn búkil álemge jariialaǵan – uly kún.
Táýelsizdik juldyzdy 27 jylda aq túieniń qarny jarylǵan, tórt qubylamyz teńelip, kók týymyz kókte jelbirep, keń baitaq jaziraly dalada qyran qustai qalyqtap, tuǵyrǵa qaita qonǵan kún.
Búgingi kún dalamyz – dánge, órisimiz – malǵa, otbasymyz – janǵa tolǵan kún.
Sondyqtan, qazaqstandyqtar úshin Táýelsizdikten artyq qasietti de qymbat eshteńe joq.
Mine, táýelsiz el bolǵanymyzǵa 27 jyl toldy. Osy az ýaqyttyń ishinde Elbasynyń sarabdal saiasatynyń arqasynda qol jetkizilgen nátijeler Qazaqstannyń álemdik qoǵamdastyqta óziniń laiyqty ornyn alýyna múmkindik berdi. Táýelsiz Qazaqstannyń turaqtylyǵy men údemeli damýyndaǵy, ultaralyq jáne dinaralyq kelisimniń ornyǵýyndaǵy, N.Á.Nazarbaevtyń róli orasan. Elbasynyń «Bolashaqqa baǵdar: rýhani jańǵyrý» jáne «Uly dalanyń jeti qyry» atty maqalalary aiasynda ulttyq mádeniet pen tarih kelbeti buryn bolyp kórmegen biik deńgeige kóterildi.
Jeltoqsannyń yzǵarymen kelgen Táýelsizdiktiń biz úshin orny qashan da bólek. Sondyqtan da «tolarsaqtan saz keshken» batyr babalarymyzdyń ár jylda tógilgen qanynyń, uly murattar jolynda qurban bolǵan asyl azamattarymyzdyń asqaq armandarynyń arqasynda qol jetkizgen Táýelsizdikti biz árqashan maqtan tutyp, qasterlei bilýge tiistimiz. Bul bizdiń azamattyq paryzymyz.
Barshańyzdy kele jatqan Táýelsizdik merekesimen shyn júrekten taǵy da quttyqtaimyn! Barsha shańyraq baiandy baq-dáýletke kenelip, elimizde yntymaq saltanat quryp, yrysymyz ortaimasyn! Táýelsizdigimiz tuǵyrly, birligimiz baiandy, elimiz eńseli bolsyn, ardaqty aǵaiyn!
Nurbol Turashbekov,
Túlkibas aýdanynyń ákimi
