Táýelsizdik jyldarynda elimizde munai óndirý 3,5 ese, gaz óndirý 7 esege ulǵaidy, dep habarlaidy QazAqparat.
Energetika ministri Maǵzum Myrzaǵalievtiń málimetinshe, elimiz táýelsizdik alǵaly óndirýdiń ósý qarqynynda aitarlyqtai serpilis baiqalǵan.
«Táýelsizdiktiń 30 jylynda munai óndirý 3,5 esege, gaz óndirý 7 esege ulǵaidy. Osy kezeńde 1,7 mlrd tonna munai, 790 mlrd tekshe metr gaz óndirildi. Al, 1,4 mlrd tonna munai eksporttaldy. 2020 jyldyń qorytyndysymen gaz óndirý kólemi 55,1 mlrd tekshe metrdi qurady. Elektr energetikasy salasynda birqatar mańyzdy jobalar júzege asyryldy. Sonyń nátijesinde elektr energiiasyn óndirý 83 mlrd-tan 108 mlrd kvt/saǵatqa deiin artty. Iaǵni 30%-ǵa ulǵaidy», -deidi Maǵzum Myrzaǵaliev.
Ministrdiń aitýyna qaraǵanda, jańartylatyn energiia kózderin damytýda da joǵary qarqyn bar. Qazir elimizde jańartylatyn energiia kózderiniń 126 obektisi jumys istep tur. Onyń jalpy qýaty 1975 MVT-ty quraidy.
«Biz osy jetistiktermen toqtap qalmaýymyz qajet. Aldymyzda munai-gaz, energetika salasyn damytýdyń jańa belesteri tur. Osy jolda aianbai eńbek etip, táýelsizdiktiń jańa onjyldyǵynda elimizdi asqaqtata bereiik», -dep atap ótti Maǵzum Myrzaǵaliev.
