Memleket basshysy Qasym-Jomart Toqaevtyń atyna Qazaqstan Respýblikasy Táýelsizdiginiń 30 jyldyǵyna orai shet memleketterdiń basshylarynan jáne halyqaralyq uiymdardyń jetekshilerinen quttyqtaý hattary men jedelhattar áli de kelip jatyr, dep habarlaidy "Ult aqparat" Aqordaǵa silteme jasap.
Túrkiia Prezidenti Rejep Taiyp Erdoǵan jeke óziniń jáne túrik halqynyń atynan shynaiy quttyqtaýyn joldady.
«Tarihi, mádeni jáne baýyrlastyq bailanystarymyz ortaq Qazaqstanmen aradaǵy strategiialyq seriktestigimizdiń ekijaqty, aimaqtyq jáne halyqaralyq deńgeide tereńdep, nyǵaiyp kele jatqanyna qýanyshtymyn», – delingen jedelhatta.
Ýkraina Prezidenti Vladimir Zelenskii quttyqtaý hatynda Qazaqstan Táýelsizdik jyldarynda óz pozitsiiasyn nyǵaityp, halyqaralyq arenada laiyqty oryn alǵanyn jazǵan.
«Elderimizdiń kópqyrly jáne ekijaqty yntymaqtastyqty odan ári damytyp, memlekettik egemendik pen aýmaqtyq tutastyqty ózara qoldaitynyna, Qazaqstan Ýkrainanyń Ortalyq Aziiadaǵy senimdi seriktesi bolyp qala beretinine senimdimin», – delingen Ýkraina basshysynyń jedelhatynda.
Shveitsariia Prezidenti Gi Parmelan óziniń quttyqtaýynda Qasym-Jomart Toqaevpen Jenevada jýyrda ótken ekijaqty kelissózderdi joǵary baǵalaǵan.
«Bizdiń kezdesýimiz ben qol qoiylǵan kelisimderdiń ekijaqty yntymaqtastyǵymyzǵa aitarlyqtai paidasy tietinine senimdimin. Osy múmkindikti paidalana otyryp, qarym-qatynastarymyzdy odan ári damytýǵa Shveitsariianyń beiildi ekenin naqtylaimyn», – delingen jedelhatta.
Italiia Prezidenti Serdjo Mattarella Nur-Sultan men Rimdi saiasi, ekonomikalyq, mádeni bailanystar biriktiretinin jáne bul qatynastardyń bolashaqqa birge qadam basýǵa, ekijaqty ózara is-qimyldy damytýǵa jol ashatynyn atap ótken.
«Elderimiz arasyndaǵy, sonyń ishinde Qazaqstan men Eýropalyq Odaq arasyndaǵy dialog aiasynda qarqyndy yntymaqtastyǵymyz Ortalyq Aziiadaǵy turaqtylyq pen ornyqty damýǵa septigin tigize beretinine senimdimin», – delingen Italiia Prezidentiniń quttyqtaýynda.
Majarstan Prezidenti Ianosh Ader Qazaqstannyń otyz jyl ishinde kóptegen sala boiynsha aitarlyqtai jetistikterge qol jetkizgenin jáne búginde Ortalyq Aziia aimaǵynda mańyzdy ról atqaryp otyrǵanyn atap ótken.
«Majarstan eki el arasyndaǵy dostyq qatynastardy nyǵaitýǵa beiildi. Strategiialyq seriktestigimiz buǵan negiz bolady. Sonymen qatar Túrki memleketteri uiymy aiasyndaǵy yntymaqtastyǵymyz ózara tyǵyz bailanystarymyzdy odan ári nyǵaitýǵa jol ashady», – delingen Ianosh Aderdiń jedelhatynda.
Aljir Prezidenti Ábdelmadjid Tebbýn óziniń quttyqtaý hatynda elimizde diplomatiialyq ókildik ashý jáne Qazaqstan astanasynda alǵashqy Aljir elshisin taǵaiyndaý jóninde bastama kótergen.
Kanadanyń General gýbernatory Meri Saimon Qasym-Jomart Toqaevty jáne Qazaqstan halqyn el Táýelsizdiginiń 30 jyldyǵymen quttyqtap, Qazaqstannyń áleýmettik-ekonomikalyq ál-aýqatyn jaqsartýǵa, memlekettik basqarý isi men zań ústemdigin nyǵaitýǵa baǵyttalǵan Prezidenttiń aýqymdy reformalaryn joǵary baǵalaǵan.
Sonymen qatar igi tilekke toly quttyqtaý jedelhattaryn Rim Papasy Frantsisk, Ulybritaniia Hanshaiymy II Elizaveta, Japoniia Imperatory Narýhito, Belgiia Koroli Filipp, Niderland Koroli Villem-Aleksandr, Shvetsiia Koroli Karl XVI Gýstav, Serbiia Prezidenti Aleksandr Výchich, Grekiia Prezidenti Katerina Sakellaropýlý, Litva Prezidenti Gitanas Naýseda, Bolgariia Prezidenti Rýmen Radev, Horvatiia Prezidenti Zoran Milanovich, Soltústik Makedoniia Prezidenti Stevo Pendarovski, Efiopiia Prezidenti Sahle-Vork Zevde, Túrki memleketteri uiymynyń Bas hatshysy Baǵdat Ámireev, IýNESKO-nyń Bas direktory Odre Azýle jáne basqalar joldaǵan.
Quttyqtaý jedelhattary áli de kelip jatyr.
