Qazaqstan táýelsiz el bolǵannan beri eki zań ǵana memlekettik tilde daiyndalǵan. Bul týraly QR Parlamenti Senatynyń depýtaty Murat Baqtiiaruly zań shyǵarý protsesin jetildirý máseleleri boiynsha ótken úkimet saǵatynda málimdedi, dep habarlaidy Baq.kz tilshisi.
«Qurmetti, Murat Baqytjanuly. Aýdarmashylar arasynda zań tiliniń túpnusqalyǵy jóninde ártúrli pikirler qalptasqan. Zań tiliniń óziniń stili bar ekeni túsinikti. Biraq túpnusqalyqtyń tym sózbe-sóz qamtamasyz etilýi zań normalarynyń memlekettik tilde sóilmeýine, zań mátinderiniń, halyqaralyq qujattardyń túsinikti bolmaýyna, qazaq tilindegi zańdardyń aýdarma retinde qalyptasýyna ákep soǵýda. Myna órkenietti elderdi bylai qoiǵanda, postkeńestik memleketterdiń barlyǵy zańdaryn memlekettik tilde ázirleidi. Bizdiń táýelsizdigimizge biyl 27 jyl tolyp otyr. Osy 27 jyl ishinde bizde eki-aq zań memleketik tilde daiarlandy. Osyǵan bailanysty suraq, memlekettik tilde daiarlaýǵa ne kedergi, qulyq joq pa, ynta joq pa, joq álde mamandar joq pa?», - dep surady depýtat Ádilet ministri Marat Beketaevtan.
Ministr zań jobalary men tujyrymdamalary memlekettik jáne resmi tilde de ázirlentinin aitty.
«Árine, bul óte kúrdeli jáne mańyzdy másele. Qoldanystaǵy zańnamaǵa sáikes barlyq tujyrymdamalar jáne zań jobalary memlekettik tilde jáne resmi tilde ázirlenedi. Ol ashyqtyǵyn qamtamasyz etýge bailanysty, mysaly barlyq tujyrymdamalar men zań jobalardyń mátinderi resmi resýrstarda mindetti túrde jariialanady jáne qoǵamdyq tyńdaýlar mindetti túrde ótkiziledi. Sol sebepten eki tilde bul jumys júrgizilip jatyr», - dep jaýap berdi ministr.
