Qazaqstannyń ishki naryǵynda taýarly gazdy kóterme saýdada ótkizýdiń jańa shekti baǵasy bekitildi. Bul týraly QR Energetika ministrliginen málim etti, dep habarlaidy "Ult aqparat".
«Respýblikany ishki gazben qamtý júzege asyrylatyn negizgi magistraldar belgilengen resýrstaryn ótedi jáne diagnostikalyq tekseristerdiń nátijesi boiynsha olardyń tozý deńgeii joǵary. Energetikalyq qaýipsizdikti qamtamasyz etýde tek óńirler bólinisinde ǵana emes, el aýqymynda da strategiialyq mańyzdy gaz infraqurylymynyń 70% paidalaný merzimi 40 jyldan asady», - dep habarlaidy QR EM baspasóz qyzmetinen.
QR zańnamasyna sáikes taýarly gazdyń kóterme saýda baǵasyn memlekettik retteýdi Energetika ministrligi, al bólshek saýda baǵasyn memlekettik retteýdi Ulttyq ekonomika ministrligi júzege asyrady.
Ishki naryqta gazdyń sońǵy baǵasyn ustap turý úshin «QazTransGaz» AQ jyl saiyn eldiń ishki naryǵyn eksport esebinen sýbsidiialaidy.
2015-2020 jyldar aralyǵynda Ulttyq operatordyń ishki naryqty sýbsidiialaýdan shekken shyǵyndar somasy shamamen 425 mlrd teńgeni qurady.
Taýarly gazdy kóterme saýdada ótkizýdiń shekti baǵalary sońǵy ret 2019 jylǵy 1 qańtarda túzetilgen bolatyn. Ol kezde baǵalar óńirge bailanysty 3,8%-dan 17,5%-ǵa deiin tómendetildi jáne osy ýaqytqa deiin kóterilgen joq.
«Qazirgi ýaqytta ishki naryqta bekitilgen taýarly gazdyń shekti kóterme saýda baǵalary jetkiziletin gazdyń ózindik qunynan tómen. Ártúrli oblystarda bekitilgen kóterme saýda baǵalary ózindik qunynan 1,5-nan 2,5 esege deiin tómen.
Osyǵan bailanysty, taýarly gazdy kóterme saýdada ótkizýdiń shekti baǵalaryn qazirgi deńgeide bekitken jaǵdaida Ulttyq operatordyń shyǵyndary ulǵaiar edi. Al investitsiialyq baǵdarlamalardyń oryndalmaýy aqyr sońynda gaz qubyrlarynyń shektik aqaýlar sanynyń artýyna ákep soǵady, bul elimizge orny tolmas nuqsan keltireri sózsiz.
Joǵaryda baiandalǵandy eskere otyryp, Qazaqstan Respýblikasynyń ishki naryǵynda taýarly gazdy kóterme saýdada ótkizýdiń 2021 jylǵy 1 shildeden bastap 2022 jylǵy 30 maýsymdy qosa alǵan kezeńge arnalǵan shekti baǵalary bekitildi. Osy buiryqqa sáikes taýarly gazdy kóterme saýdada ótkizýdiń shekti baǵalary óńirge bailanysty orta eseppen 11% kóterildi», - dedi ministrlikten.
