RF-da Qazaqstan men Resei arasyndaǵy diplomatiialyq qatynastardyń negizin qalaýshy Oraz-Muhammed Ondanulynyń tulǵasy men qyzmeti týraly halyqaralyq konferentsiia ótti. Bul týraly "Ult aqparat" Reseidegi Qazaqstan Elshiliginiń baspasóz qyzmetine silteme jasap habarlaidy.
«Qazirgi tarihtaǵy Oraz-Muhammed Ondanulynyń róli» atty ǵylymi konferentsiiaǵa Qazaqstan men Reseidiń tarihshy ǵalymdary, ýniversitet professorlary qatysty.
Konferentsiiany ashqan Qazaqstan Respýblikasynyń Resei Federatsiiasyndaǵy Tótenshe jáne Ókiletti Elshisi Imanǵali Tasmaǵambetov XVII ǵasyrdyń basynda Oraz-Muhammed Ondanuly qazaq memleketi men Máskeý memleketi arasynda diplomatiialyq negiz qalaýǵa at salysyp, airyqsha miras qaldyrǵanyn atap ótti. Ol qazaq halqymen Oraz-Muhammed sultandy araǵa úsh jarym ǵasyr salyp qaita qaýyshtyrǵan jazýshy Muhtar Maǵaýinnyń «Alasapyran» romany ekenin eske saldy.
Sondai-aq, Imanǵali Tasmaǵambetov «barsha Alash jurty úshin bairaqty babamyzdyń jat elde jarty patshalyq qurýy ańyzǵa bergisiz aqiqat ekenin aityp ótti.
«Al onyń el men eldi tabystyrǵan qyzmeti – mártebeli abyroi. Óitkeni Oraz-Muhammed orys jerine jeke dara kelgen joq. Ol búkil el amanatyn, uly dalanyń dos peiili men beibit yqylasyn ala keldi. Sodan bolar tabiǵi tákapparlyǵy men batyldyǵynyń, zerektigi men ádildiginiń arqasynda úlken bedelge ie boldy. Osy eldiń taǵdyrsheshti syn saǵatyna aralasty. Atqa qonyp, eńseli erteńi úshin kúresti. Adamdar tarihi protsesterdiń logikasyn uǵynýǵa tyrysyp qana qoimaidy, sonymen qatar protsestiń inertsiiasyna áser etip, oqiǵalardyń barysyna betburys jasaǵan qaharman tulǵalar týraly aqiqatty da bilgisi keledi. Uly Dalada ǵana emes, jat jurtta, orys jerinde dańqty isterimen tanymal bolǵan Sultan Oraz-Muhammedti osyndai tulǵalardyń shoǵyryna jatqyzýǵa bolady», - dedi elshi óz sózinde.
Eske sala ketsek, búgin Reseidiń Riazan oblysyna qarasty Qasymov qalasynda Joshy ulysynan shyqqan Oraz-Muhammed sultanǵa memorialdy taqta ornatyldy. Memorialdyq taqtany jasaý úshin tabiǵi qońyr tústi granit paidalanylǵan. Eskertkishtiń biiktigi úsh metr. Tóbesine doǵal kúmbez ornatylǵan. Estelik taqtaǵa «Oraz-Muhammed Ondanuly, 1573-1610. Qazaq sultany, Qasym handyǵyn bileýshi» dep jazylǵan.
Eskertkishtiń ashylýyna orai saltanatty shara Reseidiń mádeni muralar nysanyna engen Aýǵan-Muhammed sultannyń kesenesine jaqyn jerdegi Eski tatar ziratynda ótti.
