Tótenshe jaǵdailar ministri Iýrii Ilin jurtshylyqqa esep berý kezdesýinde eldi mekenderdi tasqynnan qorǵaý úshin jasalyp jatqan jumystar týraly málimet berdi, dep habarlaidy QazAqparat.
«Búgingi tańda kóktemgi sý tasqynyna asa beiim 905 eldi mekenniń 315-inde qaýip seiildi. Taǵy 314 eldi mekende qaýip azaityldy. Ol mekenderde 71 055 turǵyn úi jáne 358 598 adam bar. Sý basý qaýpi bar aimaqta 276 eldi meken ornalasqan. Onda 270 myńnan astam adam turady. Ótken jyldyń jeltoqsan aiynda jol kartasyn iske asyrý aiaqtaldy, respýblikalyq biýdjetten 21,6 mlrd teńge, jergilikti biýdjetterden 20,3 mlrd teńge jumsaldy», - dedi ministr.
Vedomstvo basshysy tasqynnyń ótinde turǵan eldi mekenderdiń sanyn azaitý jumysy 20323 jylǵa deiin jalǵasatynyn málim etti.
«Eldi mekenderdi sý tasqynynan qorǵaý Sý tasqynyna qarsy is-sharalardyń jol kartasy sheńberinde 2023 jylǵa deiin jalǵasady. Jalpy somasy 160,2 mlrd teńgege 212 is-shara iske asyrý kózdelip otyr. Onyń 131,6 mlrd teńgesi respýblikalyq biýdjetten, 28,6 mlrd teńgesi jergilikti biýdjetterden bólinedi», - dedi Iýrii Ilin.
Ministrdiń sózine qaraǵanda, atalǵan qarajatqa ózen arnalaryn qaita jańartý jáne tazalaý, kanaldardy, bógetterdi, gidrotehnikalyq qurylystardy salý jáne jóndeý, nóserlik kárizdi retke keltirý, avto jáne temir joldardy, kópirlerdi jóndeý josparlanyp otyr. Sondai-aq eldi tótenshe jaǵdai týraly qulaqtandyrýǵa arnalǵan 2 aqparattyń júie satyp alynbaq.
