Tashkent qalasynda qazaqtyń qoǵam qairatkeri, sheshen, Uly júzdiń bas bii Tóle bidiń 355 jyldyǵy atap ótildi, dep habarlaidy "Ult aqparat" «Habar 24» telearnasyna silteme jasap.
Is-sharaǵa Qazaqstan men Ózbekstannyń ziialy qaýymy men jergilikti qazaq diasporasynyń ókilderi, sondai-aq Túrkistan oblysynan arnaiy kelgen delegatsiia qatysty.
Jinalǵan halyq Sheihantaýr memorialdyq kesheninde qazaq biiniń rýhyna taǵzym etti. Budan bólek, Qazaqstandaǵy Ózbekstan jyly aiasynda Tóle bidi eske alýǵa arnalǵan konferentsiia ótti. Onyń barysynda baýyrlas qos eldiń ǵalymdary men jazýshylary uly sheshenniń qoǵamdyq qyzmeti týraly baiandamalar jasady.
Túrkistan oblysy Tóle bi aýdanynyń ákimi Baýyrjan Omarbek Ózbekstannyń Jazýshylar odaǵyna Tóle bidiń ómirine arnalǵan jeti tomdyq kitapty saltanatty túrde tabys etti.
Eske salaiyq, qazaqtyń úsh uly biiniń ekeýi Ózbekstanda jerlengen: Tóle bi Tashkenttegi Qarlyǵash bi mavzoleiinde, Áiteke bi - Navoi oblysynda.
«Árbir ulttyń uly tarihi tulǵalary, danalary, bileýshileri bar. Olardyń izi máńgige qalyp, eldiń mádenieti men tarihyna qyzmet etedi. Tóle bi - osyndai tulǵalardyń biri. Ol halyq úshin qiyn-qystaý kezeń bolǵan - 17 ǵasyrda eldi birlikke úndep, udaiy kómektesip otyrǵan. Eń daýly máselelerde ádil sheshim qabyldaǵan», - dedi Ózbekstan Jazýshylar odaǵynyń múshesi Ahmadjon Meliboev.
