تاشكەنت قالاسىندا قازاقتىڭ قوعام قايراتكەرٸ, شەشەن, ۇلى جٷزدٸڭ باس بيٸ تٶلە بيدٸڭ 355 جىلدىعى اتاپ ٶتٸلدٸ, دەپ حابارلايدى "ۇلت اقپارات" «حابار 24» تەلەارناسىنا سٸلتەمە جاساپ.
ٸس-شاراعا قازاقستان مەن ٶزبەكستاننىڭ زييالى قاۋىمى مەن جەرگٸلٸكتٸ قازاق دياسپوراسىنىڭ ٶكٸلدەرٸ, سونداي-اق تٷركٸستان وبلىسىنان ارنايى كەلگەن دەلەگاتسييا قاتىستى.
جينالعان حالىق شەيحانتاۋر مەموريالدىق كەشەنٸندە قازاق بيٸنٸڭ رۋحىنا تاعزىم ەتتٸ. بۇدان بٶلەك, قازاقستانداعى ٶزبەكستان جىلى اياسىندا تٶلە بيدٸ ەسكە الۋعا ارنالعان كونفەرەنتسييا ٶتتٸ. ونىڭ بارىسىندا باۋىرلاس قوس ەلدٸڭ عالىمدارى مەن جازۋشىلارى ۇلى شەشەننٸڭ قوعامدىق قىزمەتٸ تۋرالى باياندامالار جاسادى.
تٷركٸستان وبلىسى تٶلە بي اۋدانىنىڭ ەكٸمٸ باۋىرجان وماربەك ٶزبەكستاننىڭ جازۋشىلار وداعىنا تٶلە بيدٸڭ ٶمٸرٸنە ارنالعان جەتٸ تومدىق كٸتاپتى سالتاناتتى تٷردە تابىس ەتتٸ.
ەسكە سالايىق, قازاقتىڭ ٷش ۇلى بيٸنٸڭ ەكەۋٸ ٶزبەكستاندا جەرلەنگەن: تٶلە بي تاشكەنتتەگٸ قارلىعاش بي ماۆزولەيٸندە, ەيتەكە بي - ناۆوي وبلىسىندا.
«ەربٸر ۇلتتىڭ ۇلى تاريحي تۇلعالارى, دانالارى, بيلەۋشٸلەرٸ بار. ولاردىڭ ٸزٸ مەڭگٸگە قالىپ, ەلدٸڭ مەدەنيەتٸ مەن تاريحىنا قىزمەت ەتەدٸ. تٶلە بي - وسىنداي تۇلعالاردىڭ بٸرٸ. ول حالىق ٷشٸن قيىن-قىستاۋ كەزەڭ بولعان - 17 عاسىردا ەلدٸ بٸرلٸككە ٷندەپ, ۇدايى كٶمەكتەسٸپ وتىرعان. ەڭ داۋلى مەسەلەلەردە ەدٸل شەشٸم قابىلداعان», - دەدٸ ٶزبەكستان جازۋشىلار وداعىنىڭ مٷشەسٸ احمادجون مەليبوەۆ.
