Shveitsariia federaldy qylmystyq soty Takilant Ltd kompaniiasyna tiesili 293 millionnan astam dollardy kámpeskeleý týraly qaýly aldy. Bul kompaniianyń negizgi benefitsiary - Ózbekstannyń burynǵy prezident Islam Karimovtyń úlken qyzy Gúlnara Karimova.
Gibraltarǵa tirkelgen Takilant Ltd kompaniiasy Shveitsariia bankindegi eki shotpen bailanysty, olarǵa bailanysty qazir qylmystyq tergeý júrgizilip jatyr. Kompaniiadan kámpeskelengen aqshany jalpy somasy 350 million dollarǵa jetken.
Swissinfo basylymynyń jazýynsha, sot bul somanyń eleýli bóligin qulyptaýdy uiǵarǵan, óitkeni arasynda Gúlnara Karimova men onyń kómekshisi de bar birneshe adamǵa aqsha jylystatty degen aýyr aiyp taǵylyp otyr.
Alaida sot sheshimi boiynsha 70 million dollarǵa jýyq aqsha Takilant Ltd. kompaniiasyna qaitarylady, óitken tergeý birneshe kompaniiamen bailanysy bar bul aktivterdiń barlyǵy qylmystyq jolmen kelmegenin dáleldei almaǵan.
Aqshanyń eleýli bóligin kámpeskeleý týraly sot sheshimine qaramastan Gúlnara Karimovanyń advokattary sot sheshimin ishinara jeńis dep sanaidy. Bul jóninde Gúlnara Karimovanyń advokaty Gregýara Manjidiń (Grégoire Mangeat) hatynda aitylǵan. Advokat hatty elektrondy poshta arqyly Swiss Telegraphic Agency basylymyna jibergen.
"Bul qaýly, eń áýeli Gúlnara Karimovanyń Ózbekstanda ozbyrlyqpen qamalyp jatqanyn paidalanbaq bolǵan Federaldy prokýratýra jumysynyń zaia ketkenin bildiredi", – deidi Shveitsariia advokaty.
2020 jyly 18 naýryzda Tashkent qalalyq soty Gúlnara Karimovany 13 jyl tórt aiǵa bas bostandyǵynan aiyrǵan.
Ony "qylmystyq uiym qurdy, bopsamen ainalysty, urlady, qylmystyq jolmen tapqan tabystaryn zańdastyrdy" dep aiyptaǵan.
Gúlnara Karimova 2019 jyldyń kókteminen beri Tashkent oblysyndaǵy №21 áielder koloniiasynda qamaýda otyr.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
