Keshe jáne búgin Almaty qalasy sotynyń apelliatsiialyq alqasynda zańger E.Qalievtiń J.Mamai men I.Imanbaevanyń múddesi úshin olardyń sot sheshimin oryndamaǵanyna bailanysty №2 Áýezov aýdandyq sotynyń memleket kirisine ósimpul óndirip alý týraly sheshimine qatysty bergen jeke shaǵymdary qaraldy.
Kútilgendei, sot boryshkerlerdiń talaptaryn qanaǵattandyrýdan bas tartty. Bul jaǵdaida, olarǵa endi Almaty biýdjetine jalpy 280 032 teńge tóleýge týra keledi.
Sottyń shaǵymdy qanaǵattandyrýdan bas tartýy jáne onyń sebepteri óte qarapaiym. Men osyǵan deiin jazǵanymdai, jeke shaǵym zańnamalyq turǵyda saýatsyz daiyndalǵan. Sonymen qatar, shaǵymda sot sheshiminiń kúshin joiý úshin birde-bir zańdy negiz joq.
Boryshkerler ózderi de muny jaqsy túsinedi. Sondyqtan J.Mamai otyrysqa jeke qatyspaýdy jón kórip, protsesti tikelei efirge transliatsiialaýdan bas tartty. Alaida, osyǵan deiin ol ózi sot jariialylyǵynyń túbegeili mańyzdylyǵyn qoimai aitqan bolatyn.
Bul Mamaidyń da, Imanbaevanyń da óz pozitsiialarynyń senimsiz ekenin túsinetindigin aiqyn kórsetedi dep oilaimyn. Osy sot protsesteri boryshkerlerdiń ishki motivteri men shynaiy beinelerin, olardyń barlyq málimdemeleriniń negizsizdigi men jalǵandyǵyn ashyp kórsetti.
Basqasha bolý múmkin de emes: jaýapkerler birinshi jáne ekinshi instantsiialardaǵy sotqa maǵan senim bildirýshi B.Baibekke qatysty ózderiniń oidan shyǵarylǵan jáne tolyqtai jalǵan aiyptaýlaryna birde-bir dálel, fakti, qandai da bir qujat usyna almady.
J.Mamai men I.Imanbaeva pozitsiiasynyń quqyqtyq turǵyda álsizdigin olardyń zańgeri E.Qaliev te óz áreketterimen jaqsy kórsetti. Ashyǵyn aitqanda ol otyrystar barysynda alańdaýly ekenin jáne ózine senimsizdigin kórsetti. Shyn máninde, ol mándi eshteńe aita almady, sondyqtan tek sottyń jáne protsestiń basqa músheleriniń barlyq dálelderimen kelisip otyrdy.
Aitpaqshy, E.Qaliev qoldanystaǵy is júrgizý zańnamasyna qaishy áreket etetinin erekshe aityp ótkim keledi. Ol óz klientteriniń ómirin qiyndatýǵa tyrysyp, sotty jaýapkerlerge qatysty barynsha qatań sharalardy qoldanýǵa itermeleitindei kórinedi. Qaliev basty rólderde J.Mamai men I.Imanbaeva oinaityn Almaty kóshelerin sypyrý «shoýy» bolýy úshin barlyǵyn jasap jatqan siiaqty.
Aldynda aitqanymdai, boryshkerlerde B.Baibektiń ar-namysyn, abyroiyn jáne iskerlik bedelin qorǵaý týraly talap-aryzy boiynsha sot sheshimniń kúshin joiýǵa qol jetkizýdiń bir ǵana zańdy joly boldy – ol Joǵarǵy sotqa júginý. Olardyń sheshimdi oryndaýdy keiinge qaldyrý týraly ótinishterin Bas prokýratýraǵa jiberýdi barynsha sozý strategiiasy kásibi ortada tek kúmán men senimsizdik týdyrdy.
Keshegi otyrysta, E.Qaliev aqyry meniń durystyǵymdy moiyndady. Ol Joǵarǵy sotqa ótinish jibergenin málimdedi. Kassatsiialyq instantsiia isti qaita qaraý múmkindiginiń zańdy negizi bolyp tabylatyn eshqandai faktiler men dálelderdiń joqtyǵyn basshylyqqa ala otyryp, isti qaita qaraýdan bas tartady dep senimmen boljaýǵa bolady!
Degenmen, Mamai men Imanbaevada áli de jariia túrde masqara bolýdan qutylý múmkindigi bar. Ol úshin tek qana sot sheshimin oryndap, B.Baibek týraly jalǵan materialdardy joiyp, ózderiniń YouTube-arnasynda tiisti teriske shyǵarýdy jariialasa jetkilikti.
Bulai bolmaǵan jaǵdaida zańǵa sáikes olarǵa qatysty sanktsiialar jalǵasa bermek. Bul rette, 5 qarashada sot oryndaýshysy Almaty qalasy Áýezov aýdanynyń №2 sotyna Mamai men Imanbaevanyń júrgizýshi kýálikteriniń qoldanylýyn toqtata turý týraly taǵy bir usynys joldady. Bul shekteýler boryshkerler sottyń zańdy sheshimin tolyq oryndaǵannan keiin ǵana alynyp tastalady.
Mamai men Imanbaeva ózderin demokratiia men quqyq «qorǵaýshysy» retinde kórsetpes buryn, aldymen ózderi zańǵa baǵynatyn azamattar bolý kerektigin túsinýi tiis.
Aitpaqshy, búgin Mamai sot sheshimin oryndamaǵany úshin onyń kólik júrgizý quqyǵyn shekteý zańdy emes dep taǵy bir shyǵarma jazypty. Bul - onyń zańgeri E.Qalievtiń kásibi biliktiliginiń tómendigin rastaityn kórinistiń biri.
Málimet retinde sot sheshimin oryndamaǵany úshin sot oryndaýshysy boryshkerdiń kólik júrgizý quqyǵyn paidalanýyn shekteýge bastamashylyq jasaýǵa quqyly ekendigi naqty jazylǵan zańnan úzindini qosa berip otyrmyn.
B.Baibektiń ókili retinde budan ári de elimizdiń zańnamasyna sáikes sot sheshiminiń tolyq oryndalýyna qol jetkizetin bolamyn.
Zańger Aijan Táshenovanyń feisbýktaǵy jazbasynan
