Elbasy «100 jańa esim» jobasy týraly bastama kóterdi. Atqarýshy organdar bul ideiany aýada qalqyǵan kúii, tabanyn jerge tigizbesten ilip alyp ketti. Sodan beri búkil qoǵam bop jańa esimder izdep álekpiz.
Arnaiy biýro quryldy, el.kz saity arqyly ótinim qabyldaýlar bastaldy. Qazaqtyń betkeustar tulǵalary sol bir buryshqa «jaiǵasyp» ózara synǵa tústi. Iaǵni, halyqtyń daýys berý nátijesi boiynsha saralanyp, úzdikter qatarynan kóriný múmkindigine ie boldy. Bul árine, jaqsy. Irikteýdiń ashyq túrde ótkeni, kez kelgen adamnyń daýys bere alatyndyǵy kókeige senim uialatady. Bul barmaq basty, kóz qysty bolmaýy úshin tiimdi bolmaq. Taǵy bir jaqsy jaǵy, jańa esimnen úmitkerlikke qazaq eliniń kez kelgen tulǵasy óz-ózin usyna alady. Bul degeniń – ózin laiyq sanar tulǵanyń imenbei, qymsynbai úmitker atanýyna jaqsy múmkindik. Alaida, syrtynan saralaǵan adamǵa munyń teris jaǵy da bar bolyp shyqty. Ózin-ózi ulyq sanaǵan, bolmashy jetistigin zor tutqan keibir pysaqailar tasada otyryp tanylýdy kózdeitin sekildi. Árine, sait basshylyǵy tarapynan ótinimder saraptalatyny anyq. Biraq «jańa esim» bolýǵa yntyq jandar arasynan túrli adamdardy kórip, kóńilge kúmán uialaǵyny taǵy ras. Sosyn aita keter taǵy bir túiitkildi jait, úmitkerler jasyna bailanysty. «Jańa esimder» arasynda jas ta, jasamys ta jairań qaǵady. Aqyry jańa esimder izdegen ekenbiz, qyryqtyń qyrqasyna shyqqan, elýdi eńsergen, tipti alpysty alqymdaǵan aǵa-apalarymyzdy tizimge qosý qanshalyqty qajet? Qazaq elin álemge tanytyp, halyqtyń yqylasyna bólengen qanshama jas órenderimiz bar. Ǵylymi jańalyqtar ashyp nemese taǵy basqa erek talantymen el nazaryna túspei júrgen qansha daryndarymyz bar. Shyndap izdesek, 100 esimmen shektelip qalmasymyz anyq. Qudaiǵa shúkir, qazaq halqynda boiyna qasiet qonǵan, qabilet-qarymy erekshe talantty jastar kóp. Biz sol bir eleýsiz júrgen jas daryndarymyzdy nasihat etýimiz qajet. «Bulaq kórseń kózin ash» degen. Bul jobanyń maqsaty da sol emes pe edi.
Elbas Nursultan Ábishuly da búgingi zamandastarymyzdyń jetistikteriniń tarihyna basa nazar aýdarýdy usynyp, bul ideiany «Qazaqstandaǵy 100 jańa esim» jobasy arqyly iske asyrýdy tapsyrdy.
«Elimizdiń Táýelsizdik jylnamasy jazyla bastaǵanyna nebári 25 jyl boldy. Bul – tarih turǵysynan qas qaǵym sát desek te, elimiz úshin ǵasyrǵa bergisiz kezeń. Árine, jasalǵan jumystardyń mańyzy men aýqymyna eshbir kúmán joq.
Degenmen, osy qyrýar isti atqarǵan, el damýyna zor úles qosqan azamattardyń ózderi men olardyń tabysqa jetý tarihy ádette qurǵaq faktiler men tsifrlardyń tasasynda qalyp qoiady. Shyn máninde, Qazaqstannyń árbir jetistiginiń artynda alýan túrli taǵdyrlar tur», - deidi El Prezidenti óziniń «Bolashaqqa baǵdar: rýhani jańǵyrý» atty baǵdarlamalyq maqalasynda.
Ras, alýan túrli taǵdyrlar tasada qalmai, halyqqa nasihat etilip, bilik tarapynan qoldaý kórsetilýi kerek. Olardyń túrli máseleleri sheshilip, memleket qamqorlyǵyna alynǵany abzal. Saiyp kelgende qazaq jurtyn álemge áigiler tulǵalardy bairaq tutý – bárimizge ortaq paryz bolsa kerek-ti.
«Qazaqstandaǵy 100 jańa esim» jobasy – Táýelsizdik jyldarynda tabysqa jetken, elimizdiń ár óńirinde turatyn túrli jastaǵy, san alýan etnos ókilderiniń tarihy.
Jobada naqty adamdardyń naqty taǵdyrlary men ómirbaiandary arqyly búgingi, zamanaýi Qazaqstannyń kelbeti kórinis tabady», - deidi Elbasy.
Bizdiń elde júzden asa ult pen ulys ókili turatyndyqtan, bul joba barlyq etnos ókilderin qamtidy. Iaǵni, Qazaqstannyń abroiyn aspandatyp, bedelin biiktetip júrgen eldegi ózge ult ókilderi de syrt qalmaý qajet. Osy arqyly búgingi Qazaqstannyń álem aldyndaǵy kelbet-kesini aiqyndala bastaidy. Qai kezde de memlekettiń beinesi sol elden sýyrylyp shyqqan áigili adamdarmen bailanysty. Jahanǵa ortaq tulǵasy bar el – bedeli basym, syiy artyq el.
Qoryta kelgende, jańa esimderdi anyqtaýda jańsaqtyqqa jol bermei, naǵyz talanttardy tanimyz degen úmittemiz. Eldiń bolashaǵy – jastar qolynda.
Jandos Aiman
