Ońtústik Qazaqstan oblystyq Qazaqstan halqy assambleiasynyń uiymdastyrýymen óńirimizdegi etnomádeni birlestiktiń tóraǵalary men jastar qanatynyń jetekshileri tarihi, kieli oryndarǵa saparlady. Bul sapar Elbasynyń baǵdarlamalyq maqalasyndaǵy «Qazaqstannyń qasietti rýhani qundylyqtary» jobasyn iske asyrý maqsatynda uiymdastyryldy.
Etnografiialyq ekspeditsiia músheleri aldymen Ordabasy taýyna bardy. Tóbeniń tarihymen tanysyp, babalar rýhyna Quran baǵyshtady. Oblystyq assambleia tóraǵasynyń orynbasary Muratáli Qalmuratov «Ordabasy» ulttyq tarihi-mádeni qoryǵynyń murajaiyna kóne turmystyq buiymdar men kitaptar tabys etti.
Odan keiin ekspeditsiia músheleri Otyrar aýdanyna at basyn burdy. Munda olardy aýdan ákiminiń apparat basshysy Abai Qurman bastaǵan top kútip alyp, ejelgi Otyrar qalashyǵyna, Arystan bab kesenesine apardy.
Sodan soń ekspeditsiia músheleri elimizdiń rýhani astanasy – Túrkistan qalasyn betke aldy. Munda aldymen Qoja Ahmet Iasaýi kesenesine bas suǵyp, kieli shahardyń tarihyna qanyǵyp, Saýran qalashyǵyna attandy. HII ǵasyrda iri saýda ortalyǵy retinde irgetasy qalanǵan ejelgi qalanyń ornymen tanysty. Aita keterlik bir jait, kóne qaladaǵy arheologiialyq jumystar shamamen 50 gektardy quraityn territoriiany alyp jatyr. Arheologiialyq jumystar «Mádeni mura» baǵdarlamasy sheńberinde júrgizilýde.
Ekspedtsiia músheleri kieli oryndarmen tanysý arqyly qazaqtyń bai tarihyna da qanyqty. Mundai taǵlymy mol shara aldaǵy ýaqytta da jalǵasyn taýyp, tarihi oryndarǵa ár etnomádeni birlestikterdiń saiahattaryn uiymdastyrý josparlanyp otyr.
Erbolat AINABEKOV, «Ońtústik Qazaqstan»
