Qazaqtyń kórnekti tarihshysy, zulmat jyldardyń aqtańdaq betterin ashyp, búgingi urpaqqa qaz qalpynda jetkizgen ǵalym Talas Omarbekov dúnieden ótti. Bul týraly Halyqaralyq Túrki akademiiasynyń prezidenti Darhan Qydyráli Facebook-tegi paraqshasynda jazdy, dep habarlaidy "Ult aqparat" QazAqparat agenttigine silteme jasap.
«Qairan Talas aǵamyz Haqqa qaýyshypty. Tarihshylardyń tiregi edi, aqtańdaqtarǵa alǵash barǵandardyń biri edi, iri edi… Imany joldas bolsyn!», - delingen jazbada.
Talas Omarbekov 1948 jyly 29 mamyrda Jambyl oblysynyń Baizaq aýdanyndaǵy Aqjar aýylynda dúnie esigin ashqan.
Joǵary bilimdi Abai atyndaǵy QazPI-diń tarih fakýltetinde alady. 1971 jyly oqýyn támamdap, qyzmet jolyn Jambyl oblysynyń Jýaly jáne Baizaq aýdandarynda tarih pániniń oqytýshysy, oqý isiniń meńgerýshisi retinde bastady.
Ǵalym qazaqtyń kózi qaraqty qaýymyna Muhamed Haidar Dýlati muralaryn, orta ǵasyrlardaǵy tarihi tulǵalardy ulttyq kózqarasta zerdelep, qazaq tarihyn kezeńdeýdiń teoriialyq-metodologiialyq máseleleri boiynsha irgeli paiymdar jasaǵan zertteýshi retinde belgili.
Sondai-aq ol Qazaqstanda stalindik totalitarlyq júieniń ornyǵý saldaryn barynsha batyl zerttegen alǵashqy qazaq tarihshylarynyń biri boldy.
Ótken ǵasyrdyń 20-30-jyldaryndaǵy bailardy tárkileý, kúshtep ujymdastyrý saiasatynyń zardaptaryn ashyq kórsetip, sol tarihi kezeńde oryn alǵan halyq narazylyqtaryna jańa tarihi kózqaras qalyptastyrdy.
Ǵalymnyń artynda «Qazaq sharýalaryn menshiginen aiyrý jáne kúshpen ujymdastyrý», «20-30 jyldardaǵy Qazaqstan qasireti» (1997), «HH ǵasyrdaǵy Qazaqstan tarihynyń ózekti máseleri» (2001), «Qazaqstan tarihyna jáne tarihnamasyna ulttyq kózqaras» (2004) siiaqty irgeli eńbekter qaldy. 1997 jyly QR-nyń áleýmettik ǵylymdar Akademiiasynyń akademigi atanǵan.
Tarihshy kóz jumar sátine deiin «Saiasi qýǵyn-súrgin qurbandaryn tolyq aqtaý» jónindegi ulttyq komissiianyń quramynda belsendi jumys istep, ult-azattyq sipattaǵy kóterilister men qozǵalystardyń naqty sanyn turaqtandyrýǵa atsalysty.
