Tárbieshilerdiń ailyǵyn kóterý máselesi olarǵa qoiylatyn talappen birge artady. Parlament kýlýarynda Prezident joldaýynyń bilim salasyna qatysty tapsyrmalary týraly pikir bildirgen QR Oqý-aǵartý ministri Ashat Aimaǵambetov osyndai paiym aitty, dep habarlaidy QazAqparat.
«Bilim salasy Memleket basshysynyń únemi basty nazarynda. Ony jańa ózderińiz kórdińizder. Óte kóp bastama aitylyp, bizge birqatar tapsyrma berildi. Osy tapsyrmalardyń sheńberinde jumys isteimiz. 1-2 kúnnen keiin naqty qandai sharalar qabyldanatyny jóninde resmi aqparat beremiz», - deidi vedomstvo basshysy.
Sondai-aq, ol balabaqsha tárbieshileriniń ailyǵyn kótere túsý ýaqyt talabynan týyndap otyrǵan másele ekenin atady.
«Memleket basshysy ustaz mártebesi, olardyń jalaqysy týraly árdaiym aityp keledi. Jalpy kelesi jyly qańtardan bastap muǵalimderdiń ailyǵy 25 paiyzǵa kóteriledi degen tapsyrmasy bar. Oǵan búgin Memleket basshysy tárbieshilerdiń eńbekaqysyn kóterip, júktemesin azaitý qajettigin aitty. Bul – keremet nárse. Óitkeni olardyń da jalaqysy kóterilip jatqanymen, ustazdarǵa qaraǵanda az bolǵandyqtan áli de kótere túsýdi qajet etedi. Pedagogterdi attestattaý jáne akkreditteý boiynsha jumysty bastap kettik te. Endi mektepke deiingi bilim berý uiymdarynda da osyndai jumys júrgizý týraly tapsyrma berilgenin kórdińizder. Bul shyn máninde halyqaralyq tájiribede bar», - dediAshat Aimaǵambetov.
Ministr jalpy tárbieshilerdi attestattaý, muǵalimderdi akrreditteý jáne sertifikattaý, «Qolaily mektep» jobasy týraly Prezident tapsyrmalary boiynsha mindetti túrde júieli jumys júrgiziletinin málim etti.
