Tarbaǵatai aýdanynda oqshaýlaý ortalyǵy bolmaidy. Aqjarda jinalǵan halyqtyń aldyna shyqqan aýdan ákimi osylai málim etti, dep habarlaidy "Ult aqparat" ShQO Aqparat ortalyǵyna silteme jasap.
«Keshe Shyǵys Qazaqstan oblysynyń Tarbaǵatai aýdanyndaǵy Aqjar aýylynyń turǵyndary karantindik ortalyqtyń qurylýyna qarsylyq bildirip, alańǵa shyqqan bolatyn. Aýdan ákimi densaýlyq saqtaý basqarmasy basshysynyń «Ýaqytsha statsionar ashý týraly» buiryǵynyń 9 jáne 9.1 tarmaqtarynyń kúshin joiý týraly aimaq basshysynyń qaýlysyn kórsetip, jinalǵan jurtshylyqty sabyrǵa shaqyrdy», delingen habarlamada.
Qazirgi ýaqytta aýdanda oblys ákiminiń orynbasary Baqytjan Baiahmetovtiń qatysýymen aýqymdy túrde túsindirý jumystary júrgizilip jatyr. Baqytjan Kakenqajyuly áleýmettik jelide taraǵan aqparatty joqqa shyǵardy.
«Tarbaǵatai aýdany Aqjar aýylynda ornalasqan Týberkýlez dispanserine qytaidan kelgen azamattar karantinge jatqyzylady» degen málimet shyndyqqa janaspaidy. Tek qaýeset», delingen habarlamada.
Sondai-aq jiynǵa qatysýshylarǵa kórshiles memlekette taraǵan indettiń aldyn-alýǵa bailanysty memleket tarapynan atqarylyp jatqan jumystar jóninde maǵlumat berildi. Osy rette aýdan turǵyndary aýrýhanalardyń jaǵdaiy jáne olardyń meditsinalyq qajettiliktermen jabdyqtalýy, jedel-járdem qyzmeti týraly ózekti suraqtardy kóterdi.
