Taraz qalasynda kópqabatty úide oryn alǵan jarylystan zardap shekkenderge oblystyq ákimdik tarapynan tiisti kómek kórsetilýde. Tótenshe jaǵdaidan qaza tapqandar sany 3 adamǵa jetti, dep habarlaidy "Ult aqparat" oblys ákiminiń baspasóz qyzmetine silteme jasap.
Budan buryn habarlaǵanymyzdai, búgin tańǵy saǵat 06:21-de Taraz qalasy №9 «Myńbulaq» yqshamaýdanyndaǵy 62-úide jarylys bolyp, kópqabatty úidiń bir bóliginiń 1-3 qabattary qulaǵan edi.
«Oqys oqiǵa 2-qabattaǵy 49-shy páterde oryn alǵan. Aldyn ala boljam boiynsha, jarylys gaz jabdyqtaryn abaisyz paidalanýdan oryn alǵan. Oqiǵaǵa bailanysty qajetti mamandar men tehnika jumyldyryldy. Úidiń barlyq turǵyndary tolyǵymen qaýipsiz jerge kóshirildi. 8 adam zardap shegip, 3 turǵyn qaza tapqan» delingen oblys ákimi baspasóz qyzmetiniń habarlamasynda.
Qazirgi kezde oblys ákimdiginiń qoldaýymen zardap shegýshiler barlyq qajetti kómekti alyp otyr. Atap aitsaq, apat bolǵan úidiń 100-den astam turǵynyna №47 mektepte ystyq tamaq berilip, psihologiialyq-meditsinalyq kómek kórsetilip jatyr. Sondai-aq, zardap shegýshiler qaladaǵy № 13 «Báiterek» móltekaýdanyndaǵy kópqabatty úidegi bos páterlerge ýaqytsha jaiǵastyrylýda. Olardyń jaǵdaiy turaqty baqylaýda bolady.
Tótenshe jaǵdaiǵa bailanysty oblys ákiminiń birinshi orynbasary Bekbolat Orynbekovtyń tóraǵalyǵymen oblystyq jedel shtab quryldy. Sondai-aq, +7-7262-513575 nómiri boiynsha jedel jeli jumys istep tur.
Búginde Taraz qalasynda nysandyq tótenshe jaǵdai jariialandy. Jalpy bul baǵytta aldyn ala saqtyq sharalary retinde qala biýdjetinen 91,5 million teńge qarastylǵan. Atalǵan oqiǵaǵa bailanysty naqty shyǵyndarǵa taldaý jasalady. Qajet bolǵan jaǵdaida, oblystyq qazynadan da qarjy bólinbek.
Aita ketý kerek, osy tótenshe jaǵdai týraly QR Premer-Ministri Asqar Mamin shuǵyl túrde Qazaqstan Prezidenti Nursultan Nazarbaevqa baiandaǵan bolatyn. Memleket basshysynyń tapsyrmasy boiynsha QR Premer-Ministriniń orynbasary J.Qasymbektiń tóraǵalyǵymen úkimet komissiiasy quryldy. Komissiia músheleri men Astana qalasynda issaparda júrgen oblys ákimi Asqar Myrzahmetov Taraz qalasyna shuǵyl ushyp kelip, oqiǵa ornyna bardy. Bolǵan jaǵdaimen jan-jaqty tanysyp, japa shekkenderdiń hal-jaǵdaiyn bilip, qaza bolǵandardyń jaqyndaryna kóńil aitty.
