Taraz qalasyndaǵy «Balasaǵun» kontsert zalynda ótken jyr alyby Jambyl Jabaevtyń 175 jyldyq mereitoiyna arnalǵan «Jambyl – meniń jai atym, halyq – meniń shyn atym» atty respýblikalyq aitys máresine jetti, dep habarlaidy "Ult aqparat".
Elimizdiń ár óńirinen kelgen jiyrma aqynnyń ishinde jambyldyq Aitmuhanbet Isaqov pen qostanailyq Aibek Qaliev aqyndardyń alǵashqy jubyn qurasa, sóz óneriniń alǵashqy ainalymyn Baizaq aýdanynyń týmasy Altynkúl Qasymbekova men almatylyq Shuǵaiyp Sezimhan túiindedi.
Ǵasyr jasaǵan Jambyl babamyz ben elimizdiń aqpan aiynda týǵan birqatar tulǵalaryn, Táýelsizdigimizdiń 30 jyldyǵyn jyryna arqaý etken aqyndar jaqsy aitys jasai bildi.
Kópten beri aitys kórmei ańqasy kepken kórermenniń meiiri jyrǵa qandy.
Osylaisha 10 jup aqynnyń ishinde 3 jup aqtyq ainalymǵa ótti.
Aqtyq aiqasta jurt jambyldyq Shapaǵat Sábitqyzy men Shuǵaiyp Sezimhannyń, túbi túrkistandyq Erkebulan Qainazar men jerlesimiz Qanat Myrzahannyń, qyzylordalyq Nurmat Mansur men Shyǵys Qazaqstan oblysynan kelgen Rústem Qaiyrtaiulynyń tartysty ónerin tamashalady.
Jyr dodasy qas qaraiǵansha sozylyp, Halyq ártisi Asanáli Áshimov bastaǵan qazylar sheshimimen bas júlde Jambyl oblysynyń týmasy Qanat Myrzahannyń qanjyǵasyna bailandy.
Toptan oza shapqan oǵlanǵa oblys ákimi Berdibek Saparbaev 2 million teńgeniń sertifikatyn tabys etti.
Al birinshi orynǵa laiyq dep tanylǵan Rústem Qaiyrtai men Erkebulan Qainazarovqa 750 myń teńgeden berildi.
Árqaisy 500 myń teńgeniń sertifikatyna ie bolǵan Shapaǵat Sábitqyzy men Nurmat Mansur ekinshi orynǵa taban tiredi.
Pavlodar oblysynyń týmasy Aspanbek Shuǵataev, Petropavldan kelgen Jarqyn Juparhan, Shuǵaiyp Sezimhan úshinshi oryndy mise tutyp, olarǵa 300 myń teńgeniń sertifikattary tabys etildi.
Sondai-aq, 3 aqynǵa yntalandyrý syilyǵy berilse, qalǵan qatysýshylar oblys ákiminiń Alǵys hatymen marapattalyp, aqshalai syilyqqa ie boldy.
