Taraz memlekettik pedagogikalyq institýtynda «Jas ǵalym 2017» atty Halyqaralyq ǵylymi-praktikalyq konferentsiiasy ótti. Altynshy ret uiymdastyrylǵan alqaly jiynǵa 400-den astam jas daryn jinaldy, dep habarlaidy TarMPI-dyń Aqparattyq-imidjdik qyzmetiniń jetekshisi Jandar Asan.
Olardyń arasynda Qazaqstannyń barlyq aimaǵyndaǵy orta mektep pen joǵary oqý oryndarynyń stýdentteri, magistranttary men doktoranttary bar. Sondai-aq, sharaǵa tanymal tarihshylar men belgili ǵalym-zertteýshiler, Qazaqstan, Japoniia jáne Qyrǵyzstannyń arnaiy bilim berý mekemeleriniń qyzmetkerleri de shaqyrylǵan.
Pedagogikalyq oqý orny konferentsiiany elimizdegi jas ǵalymdardyń shyǵarmashylyq qabiletin shyńdaý úshin eki jylda bir ret uiymdastyrady. Biylǵy keńes TarMPI-dyń 50 jyldyǵyna arnalyp otyr.
Taraz memlekettik pedagogikalyq institýtynyń Tárbie isi jáne áleýmettik máseleler jónindegi prorektory Orynqyz Joldasova institýt rektory Dariia Qojamjarovanyń konferentsiiaǵa qatysýshylarǵa joldaǵan quttyqtaý hatyn oqyp berdi.
– Memleket basshysy Nursultan Nazarbaev elimizdi ǵylymi-innovatsiialyq salada zor serpilis jasap, eýraziialyq keńistikte osy salanyń kóshbasshylardyń biri bolý kerektigin mindettedi. Qazirgi kúnde jan-jaqty damyǵan ǵylymsyz órkenietti memleketterdiń qataryna qosylý múmkin emes ekeni barshaǵa belgili aqiqat. Sizder – sol ǵylym áleminde baq synap júrgen jas urpaqtyń ókilderisizder. Týrasyn aitsaq, sizderdiń bolashaqtaryńyz – eldiń bolashaǵy, ulttyń erteńi. Aldymyzǵa qoiyp otyrǵan bul mindetter asa aýqymdy. Ol úshin bárimizge úlken kúsh-qairat, erik pen jiger kerek. Bastysy bilim men ǵylym kerek. Qazaqstan ekonomikasynyń ózegi bilim men ǵylymǵa negizdelýi qajet. Sonda ǵana josparymyz oryndalyp, kózdegen maqsat údesinen shyǵatynymyzǵa senimdimiz, – delingen rektor quttyqtaýynda.
Konferentsiia barysynda Taraz memlekettik pedagogikalyq institýtynyń saiasattaný ǵylymdarynyń PhD doktoranty, bilim ǵylymdarynyń PhD doktoranty Lázzát Ilimhanova «Akademiialyq hattardyń Qazaqstan ǵylymyndaǵy mańyzy: álemdik tendentsiialar», Qazaq memlekettik qyzdar pedagogikalyq ýniversitetiniń professory, pedagogika ǵylymdarynyń doktory Gúlnar Muratbaeva «Baǵalaý ólshemderi – bilim sapasyn baqylaýdyń senimdi quraldary», Taraz memlekettik pedagogikalyq institýtynyń dotsenti, filologiia ǵylymdarynyń kandidaty Galina Bedýsenko «Rol dialoga v protsesse obýcheniia rýsskomý iazyký nerýsskoi aýditorii», Qazaq memlekettik qyzdar pedagogikalyq ýniversitetiniń PhD doktoranty Railia Izmaǵambetova «Oqytýdyń innovatsiialyq ádis-tásilderi» jáne Taraz memlekettik pedagogikalyq institýty janyndaǵy J. Balasaǵun atyndaǵy Túrkistan ólkesiniń tarihyn zertteý ortalyǵynyń direktory, tarih ǵylymdarynyń kandidaty Ordaly Qońyratbaev «Turar Rysqulov jáne Ortalyq Aziia stýdentteri» taqyryptarynda baiandamalar jasady.
Konferentsiianyń basty maqsaty – jas ǵalymdardyń jasampazdyq áleýetin damytý, olardy zamanaýi ǵylymnyń mańyzdy máselelerin sheshýge belsendi túrde tartý, ǵylymi bilim berý keńistigin damytý. Sondai-aq, jiynnyń taǵy bir kózdegeni – izdenýshilerdiń ózara bailanys ornatýlaryna, tájiribe almasýlaryna yqpal jasaý. Aita ketý kerek, bul oraida Taraz memlekettik pedagogikalyq institýtynda «Kids University» jobasy iske asyrylýda.
Biylǵy konferentsiia gýmanitarlyq jáne jaratylystaný ǵylymdary sektsiialary boiynsha ótkizildi. Atalǵan sektsiialar boiynsha barlyǵy 500-den astam jumys kelip túsken.
Shara barysynda qazaqstandyq jas izdenýshilerdiń ǵylymi jetistikteriniń kórmesi ótkizilip, otandyq jáne sheteldik ǵalymdardyń jastarǵa arnalǵan sheberlik synyptary júrgizildi.
Jambyl oblysyndaǵy Kókdónen orta mektebiniń 9-synyp oqýshysy Baqnur Baieliev konferentsiiaǵa eldi mekenderdi aýyz sýmen qamtamasyz etýge arnalǵan ǵylymi jańalyǵyn ala kelipti.
– Bizdiń aýylda sý kúndiz ǵana aǵady. Ol kemshilikti joiý úshin sýdy qaita ainalmaly jolmen úlken munaraǵa quiyp, jibergim keledi. Eger táýlik boiy sýdy úzdiksiz aǵyzsaq, olardy tikelei úige qoiyp alsa da bolady, – deidi B. Baieliev.
– Óskeleń urpaqtyń shyǵarmashylyq, ǵylymi-zertteý jumystaryn nasihattaý men ony keń kólemde jariialaýda, olardyń tulǵalyq damýdyń tásili retindegi jobalyq zertteý is-áreketterine tartýda jáne bilim berý úrdisiniń tiimdiligin kóterý men qoldanbaly ǵylymǵa degen qyzyǵýshylyqtaryn damytýda osy taqilettes jiyndardyń mańyzy zor, – deidi shara uiymdastyrýshylary.
Konferentsiiaǵa kelip túsken materialdar negizinde arnaiy jinaq shyǵarý kózdelip otyr. Bul óz kezeginde elimizdegi izdenýshi jastarǵa, ǵylymi jumystarmen ainalysatyn ǵalymdarǵa jáne innovatsiialyq damý strategiiasyn josparlap, júzege asyrýshylar úshin mańyzdy teoriialyq jáne ádistemelik kómekshi qural bolmaq.
"Ult aqparat"
