Taraz qalasynda Qazaqstan Respýblikasy Táýelsizdiginiń 30 jyldyǵyna orai qazaqtyń áigili úsh biiniń – Tóle, Áiteke jáne Qazybektiń eskertkishi ashyldy, dep habarlaidy QazAqparat.
Danalyq pen ádildiktiń simvolyndai bolǵan úsh bidiń eskertkishi Jambyl oblystyq soty ǵimaratynyń aýmaǵynda ornalasqan.
Ashylý saltanatyna Jambyl oblysynyń ákimi Berdibek Saparbaev, Jambyl oblystyq sotynyń tóraǵasy Erbol Ahmetjanov, QR Joǵarǵy sotynyń burynǵy tóraǵasy Musabek Turǵanbekuly, Jambyl oblystyq sotynyń burynǵy tóraǵasy Maqsut Ábilqaiyrov jáne sot júiesiniń ardagerleri qatysty.
Erbol Ahmetjanov pen Musabek Turǵanbekuly eń kúrdeli kezeńde qazaqtardy biriktirýde sheshýshi ról atqaryp, eldiń erkindigi men táýelsizdigi úshin kúresken uly bilerdiń rýhani muralary, ónegeli eńbekterine toqtaldy.
«Qazaq bileriniń ədil sot isin damytýǵa jəne nyǵaitýǵa qosqan úlesteri ólsheýsiz. Áitek bi, Qazybek bi, Tóle bidiń qazaq halqynyń qalyptasýyna, onyń
sot tóreligimen tyǵyz bailanysty bolǵanyn atap ótkenimiz abzal. Eskertkish danalyq pen ádildiktiń nyshany»,- dedi M.Turǵanbekuly.
Budan soń eskertkishke gúl shoqtary qoiyldy.
Saltanatty ashylý rásiminen keiin qonaqtar oblystyq sottyń jańa ǵimaratynda bas qosty. Oblys ákimi Berdibek Saparbaev ár zamannyń ózine sai sot júiesi bolǵanyn, kezindegi Biler keńesi sonyń aiǵaǵy ekendigin atap ótti.
«Táýelsizdik merekesi qarsańynda oblysymyzdyń ortalyǵy sanalatyn tarihi Taraz qalasynyń kórkine sán qosyp turǵan oblystyq sottyń jańa ǵimaratynyń aldynan, alty alashtyń áigili bileriniń eskertkishi ashylýy – tarihi mańyzdy oqiǵa jáne tárbielik máni zor.
Tóle bi, Áiteke bi, Qazybek bidiń esimderi qazaq memlekettiligi men qazaq sot tóreligi negiziniń qalanýy tyǵyz bailanysty. Ómirlik tájiribesi men minsiz bedeliniń arqasynda óz zamanynda olardyń sheshimderi ádil bolǵan jáne kúmán týdyrmaǵan.
Jaqynda Taraz qalasynda ótken «Sot júiesi ǵalymdarynyń dialogy» I Halyqaralyq forýmyna QR Joǵarǵy Sotynyń Tóraǵasy Jaqyp Asanov, QR Joǵarǵy Sotynyń sýdiasy, Sýdialar odaǵynyń tóraǵasy Sáken Abdolla, sýdia-ǵalymdar, Resei, Túrkiia, Qyrǵyzstan, Ózbekstan men Belarýssiiadan kelgen sheteldik zańger ǵalymdar qatysyp, oramdy oilaryn ortaǵa saldy.
Oblystyq sottyń taǵylymdy tarihy, óz orny qalyptasqan. Sala ardagerleriniń tabysty eńbegin sabaqtastyra otyryp, búgingi qyzmetkerler de adaldyq, týralyq, zańdylyq qaǵidattaryn basshylyqqa alyp otyrýy tiis. Bul halyqtyń sot júiesine degen seniminiń arta túsýi úshin asa mańyzdy», - dedi oblys ákimi.
Aita keteiik, jańa eskertkish betonnan quiylyp, mármár tuǵyrǵa ornatylǵan.
Monýment avtory – músinshi Temirhan Qoljigit. Eskertkishtiń biiktigi – 3,50 metr.
