Tarazda belgili biznesmenniń qyzyn urlaǵandarǵa sot úkimi shyqty. Qylmystyq toptyń 6 múshesi 5 jyldan 13 jylǵa deiin bas bostandyǵynan aiyryldy, dep habarlaidy "Ult aqparat" «Habar 24» arnasyna silteme jasap.
Olar kásipkerdiń qyzyn qaitarý úshin 100 million teńge talap etken.
Biyl kóktemde bolǵan oqiǵa týraly jábirlenýshi Svetlananyń ózi aityp berdi. Balasyn mektepke aparyp, úiine jaqyndaǵan boida eki adam ony uryp-soǵyp, kólikke kúshtep otyrǵyzǵan. Qarsylyq tanytqanymen, onysynan eshteńe shyqpaǵan. Tipti onyń qolyn da syndyrǵan. Qylmyskerler oǵan qara bas kiim kigizip, aýzyn skotchpen tyǵyndap, belgisiz baǵytqa alyp ketken. Alaida arada 3 kún ótken soń bosatyp qoia bergen.
Bostandyqqa shyqqan áiel dereý politsiiaǵa habar beredi.
"Meni bir úige kirgizgennen keiin qolyma kisen salyp, aiaǵymdy skotchpen orap tastady. Alǵashqy 2 kún boiy meni sol úide ustady, sosyn nege ekeni belgisiz, basqa úige apardy. Men ne bolyp jatyr, meni munda nege ákeldińder dep suradym. Olar maǵan "sen - baisyń, sondyqtan seni ustaý úshin Almatydan keldik" dedi", - deidi Svetlana Ilichiova-Mosýnova.
Al, oblystyq prokýratýranyń basqarma prokýrory Saiyn Saǵyndyqtyń aitýynsha, mundai qylmys Jambyl oblysynda sońǵy 10 jylda oryn almaǵan.
"Politsiia organdary bul qylmysty jedel túrde ashyp, barlyq qylmysker áshkerelenip, ustaldy. Qazirgi ýaqytta úkim zańdy kúshine engen joq. Óitkeni sottalǵandar apelliatsiialyq tártippen shaǵymdanýda" - deidi ol.
