Foto: yourchoice.ru
SCAT áýekompaniiasynyń «Atyraý-Taraz» baǵytyndaǵy reisi ushyp kelgennen keiin Taraz qalasy áýejaiyndaǵy jelilik politsiia bólimshesiniń qyzmetkerleri akt boiynsha quqyqbuzýshyny túsirip aldy, dep habarlaidy "Ult aqparat" Kóliktegi politsiia departamentine silteme jasap.
Tekserý barysynda kólik politseileri Atyraý qalasynyń 15 jastaǵy turǵynyn anyqtaǵan. Ol ushý kezinde ushaq salonynda elektrondy temeki shekken.
"Politsiia qyzmetkerleri kámeletke tolmaǵan jolaýshymen profilaktikalyq áńgime júrgizdi. Saqshylar oǵan temeki shegýdiń, alkogoldi ishimdik ishýdiń jáne basqa da qaýipti psihotroptyq zattardyń densaýlyqqa ziiandylyǵy týraly aitty. Sondai-aq ushaq bortynda qaýipsizdik erejelerin saqtaý kerektigin túsindirdi.
Budan bólek, qyzdyń zańdy ókiline qatysty QR ÁQBtK 127-babynyń 1-bóligimen, iaǵni kámeletke tolmaǵandy tárbieleý jáne (nemese) oǵan bilim berý, onyń quqyqtary men múddelerin qorǵaý jónindegi mindetterdi oryndamaý boiynsha ákimshilik hattama toltyrylyp, 10 AEK (36 920 teńge) kóleminde ákimshilik aiyppul salyndy" - delingen habarlamada.
Aita keteiik, 2023 jyly Kóliktegi PD qyzmetkerleri túrli ákimshilik quqyqbuzýshylyqtar jasaǵany úshin 45 962 azamatty, onyń ishinde, áýe kemesiniń bortynda temeki ónimderin tutynǵany úshin 213, kámeletke tolmaǵan adamdy tárbieleý jónindegi mindetterdi oryndamaǵany úshin 70 tulǵany ákimshilik jaýapkershilikke tartqan.
