Tanzaniialyq qazyna izdeýshi eki úlken jáne baǵaly tanzanit tasyn tapqannan keiin bir tún ishinde millionerge ainaldy, dep habarlaidy "Ult aqparat" agenttigi BBC-ge silteme jasap.
Saniniý Laizer eldiń Taý-ken qazý ónerkásibi ministrliginen jalpy salmaǵy 15 keli tanzanitterdi tapqany úshin 2,4 mln fýnt sterling ($3,4 mln) aldy.
«Erteń saýyq keshi bolady», - deidi Laizer myrza.
El prezidenti Djon Magýfýlidiń ózi Laizer myrzaǵa habarlasyp, erekshe tabysymen quttyqtaǵan.
52 jastaǵy Saniniý Laizerdiń tórt áieli, 30-dan asa balasy bar. Ol saýyq keshin uiymdastyrý úshin siyr soiatynyn aitty.
Laizer bolashaqqa josparyn da bólisti. Ol Maniardaǵy týǵan jerine investitsiia quiǵysy keledi.
«Men saýda ortalyǵy men mektep ashqym keledi. Mektep meniń úiimniń janynda bolady. Ol jaqta balalaryn mektepke aparýǵa jaǵdaiy jetpeitin kedei adamdar kóp».
Onyń aitýynsha, bul oqiǵa onyń ómir saltyn ózgertpeidi, ol ary qarai da óziniń 2000 siyryn baǵa beredi.
Baǵaly tastyń ereksheligi - túsiniń ártúrliliginde. Onyń jasyl, qyzyl, kúlgin jáne kók túsi bolady. Ol óte sirek kezdesetindikten baǵaly jáne móldir, túsi qanyq bolǵan saiyn onyń quny da joǵary bolady.
Laizer sekildi altyn izdeýshiler tanzanitti izdeýge memlekettik litsenziia alady. Soǵan qaramastan elde tanzanitti zańsyz jolmen izdeý keń taraǵan. Ásirese, iri kompaniialarǵa tiesili shahta mańynda osyndai oqiǵalar jii bolady.
2017 jyly prezident Magýfýli áskerilerge álemdegi tanzanit bar jalǵyz meken sanalatyn Maniardaǵy Merelani ken ornynyń ainalasyna 24 shaqyrymdyq qabyrǵa soǵýdy tapsyrdy.
Bir jyldan keiin úkimet taý-ken óndirisi sektorynda kiristiń artqanyn habarlap, ony qabyrǵa ornatýmen bailanystyrdy.
