Tanymal qazaqstandyq jelaiaq Marat Jylanbaev Ekibastuz máslihatynyń depýtaty bolǵan kezindegi altyn tósbelgisin satatynyn aitty, - dep habarlaidy Tengrinews.kz tilshisi.
Jelaiaq tósbelgisi satylatynyn Facebook jáne Instagram-paraqshalarynda aitty. Jylanbaevtyń sózinshe, tósbelgi bastapqy baǵa boiynsha 100 myń teńgege satylady.
Sportshynyń aitýynsha, alty gramdyq 375 synamaly tósbelgini 2003 jyly Ekibastuz máslihatynyń depýtaty bolyp taǵaiyndalǵan kezinde alǵan.
"Bul tósbelgiler qandai aqshaǵa satyp alynǵany men úshin áli jumbaq. Zań boiynsha máslihat depýtattaryna tósbelgi berilmeýi kerek. Biraq ol kezde 17 ekibastuzdyq depýtatqa altyn tósbelgi berdi. Oǵan biz tólegen joqpyz. Qazir ony taqpaimyn, taǵýǵa sebep te joq, onyń ústine bul tósbelgi jaǵymsyz estelikterdi eske salady. Sondyqtan satylymǵa qoidym", - deidi Jylanbaev.
Sportshynyń jaǵymsyz estelik dep otyrǵany - 2006 jyly bolǵan oqiǵa. Sol jyly Ekibastuzda tájiribe retinde depýtattarǵa qala ákimin sailaý usynylǵan bolatyn.
"Biz halyq senetin, qurmetteitin ákimdi tańdaimyz dep ózara keliskenbiz. Árkim óz okrýginde halyqpen sóilesip qaitty. Barlyq okrýgtegi halyq Valerii Nabitovskiidi ákim etip sailaýdy surady. 17 depýttattyń 16-sy sol kisige daýys berdi. Biraq artynsha qysym kórsetile bastady, basqa adamdy tańdaý úshin direktiva jiberildi. Qylmystyq is qozǵalýyna deiin bardy. Sailaý ádil ótpedi, sol kezde men jáne úsh áriptesim depýtattyqtan bas tarttyq. Al tósbelgi mende qalyp qoidy, sebebi ony eshkim qaitarýdy suramady", - deidi jelaiaq.
