Qazaqstandaǵy tótenshe jaǵdai rejiminiń aiaqtalýyna bailanysty qoǵam belsendileri Úndeý jasady, dep habarlaidy "Ult aqparat".
Atap aitqanda Murat Ábenov, Andrei Chebotarev, Erlan Sairov, Tóleýtai Rahymbekov, Aýyt Muqibek, Raýan Kenjehanuly, Ulyqbek Esdáýlet, Qabdesh Jumadilov, Esenǵali Raýshanov, Serik Aqsuńqaruly, Berik Ábdiǵaliuly, Marat Báshimov, Bakytbek Smaǵul, Talǵat Qaliev, Maksim Spotkai, Dáýren Qýat, Ashat Sadyrbai siiaqty tanymal qazaqstandyq qoǵam qairatkerleri men Ulttyq qoǵamdyq senim keńesiniń músheleri Memleket basshysy Qasym-Jomart Toqaevtyń 2020 jyldyń 11 mamyrynda Tótenshe jaǵdailar jónindegi Memlekettik komissiianyń qorytyndy májilisinde jariialaǵan bastamalaryna qoldaý bildirdi.
«11 mamyrda Tótenshe jaǵdai jónindegi memlekettik komissiianyń otyrysynda QR Prezidenti Qasym-Jomart Toqaev Qazaqstandaǵy tótenshe jaǵdai rejiminiń aiaqtalǵanyn jariialady. Tótenshe jaǵdai rejiminiń engizilýiniń arqasynda koronavirýstyń elde keńinen taralýyna jol bermeýdiń naqtyly ári tiimdi sharalary jasaldy. COVID-19 koronavirýs infektsiiasymen kúresýdiń qazaqstandyq strategiiasy halyqaralyq sarapshylar tarapynan da joǵary baǵalandy», - delingen habarlamada.
Sonymen qatar, 11 mamyrdaǵy Memlekettik komissiia otyrysynda Memleket basshysy pandemiia men ekonomikalyq daǵdarys jaǵdaiynda ulttyq ekonomikany jáne azamattardyń ál-aýqatyn qoldaýdyń jańa tetikterin usyndy.
«Biz Memleket basshysy usynǵan sharalardy tolyǵymen qoldaimyz. Bul bastamalardy iske asyrý pandemiia kesirinen týyndaǵan ekonomikalyq daǵdarys kezinde mańyzdy ekonomikalyq jáne áleýmettik shyǵyndardyń aldyn alady. Sondai-aq, tótenshe jaǵdaidyń toqtatylǵanyna qaramastan, biz qazaqstandyqtardy karantin normalary men talaptaryn saqtaýǵa shaqyramyz.
Pandemiiamen kúres áli de jalǵasýda. Qalyptasqan jaǵdaidyń qaýpi men mańyzdylyǵyn eskermeýge bolmaidy. Azamattardy biliktiń barlyq nusqaýlaryn oryndaýǵa jáne odan ári karantin sharalaryn saqtaýǵa shaqyramyz. Bul jaǵdaiǵa beijai qaramaýdy ótinemiz. Bizdiń qaýipsizdigimiz ben ál-aýqatymyz birinshi kezekte ózimizdiń jaýapkershiligimizge jáne áleýmettik qashyqtyq standarttaryn saqtaýǵa bailanysty. Synaqty birge ótkereiik!»,-delingen Úndeýde.
