Foto: videodan skrinshot
Almaty oblysynyń Qaskeleń qalasynda otbasylyq zorlyq-zombylyq deregi boiynsha qylmystyq is qozǵaldy. Oqiǵa 24 qańtardan 25 qańtarǵa qaraǵan túni bolǵan, dep habarlaidy Ult.kz.
Aldyn ala málimetke sáikes, ajyrasý protsesinde júrgen er adam jubaiynyń úiine zańsyz kirip, týyndaǵan janjal kezinde áielin jáne onyń anasyn taiaqpen urǵan. Sonymen qatar kúdikti úidiń terezelerin syndyryp, avtokólikke qasaqana zaqym keltirgen. Turǵyndardyń aitýynsha, kúdikti elge tanymal asaba.
Áleýmettik jelilerde jariialanǵan videoda jábirlenýshi bolǵan jaǵdaidy baiandap, shabýyl saldaryn kórsetedi. Oqiǵa týraly habar túsken soń oqiǵa ornyna politsiia qyzmetkerleri jetken.
«Ol meni kezekti ret uryp-soqty. Kóligimdi de búldirdi. Kúrektiń sabymen aiaǵymdy, arqamdy ońdyrmai urdy. Anamdy da soqqyǵa jyqty. Sol qolymdy múldem sezbei turmyn, bet-aýzym qan-qan. Balalarymyzdy syltaýratyp, olardy alyp ketken saiyn uryp-soǵady. Politsiiany shaqyrdym, qazir kútip otyrmyn. Ótinemin, maǵan kómektesińizder. Prokýratýraǵa da aryz jazamyn», – dedi ol.
Almaty oblystyq politsiia departamentiniń málimetinshe, 31 jastaǵy kúdikti ustalyp, ýaqytsha ustaý izoliatoryna qamaldy. Atalǵan fakti boiynsha eki bap boiynsha qylmystyq ister tirkelip, sotqa deiingi tergep-tekserý amaldary júrgizilip jatyr.
