Áskeri mamandyqtarǵa qatysty «Armiia oiyndary – 2017» halyqaralyq jarysy sheńberinde Resei Federatsiiasynyń «Alabino» poligonynda 29 shilde – 12 tamyz aralyǵynda ótken «Tank biatlony – 2017» saiysynda QR QK Qurlyq áskeriniń tank ekipajdary alǵashqy kezeńnen-aq topty jardy.
Jaýyngerlik kólikti júrgizýden, túrli qashyqtyqtaǵy nysanalardy joiýdan, tankige qarsy ótkelder men bógetterden ótýden de aldyna jan salmady. Eki aptaǵa sozylǵan «Tank biatlony – 2017» saiysynyń finalynda QR QK Qurlyq áskeriniń 1-shi ekipajy 36 minýt 07 sekýndta, 2-shi ekipajy 37 minýt 06 sekýndta, 3-shi ekipajy 32 minýt 28 sekýndta márege jetti. Jalpy ýaqyty 1 saǵat 45 minýt 41 sekýnd nátijesimen elimizdiń úzdik tankishileri ekinshi oryndy ielendi.
Aǵa serjant Erasyl Jumaǵulov: «Biylǵy biatlonda bes túrli tank, atap aitqanda Resei T-72B3MK, Qytai Type 96, Úndistan T-90 jáne Belorýs óz tankilerin, qalǵan 15 memleket Reseidiń T-72 tankisin tizgindedi. Resei tankisinde 1200, Belarýs tankisinde 1130, al bizdiń tankide 840 attyń kúshi bar ekenin eskerińiz. Soǵan qaramastan tankige qarsy ótkelderden, sýly shuńqyrlardan, kedergilerden, minaly-jarylys pen soqqy berý bógetinen, tóbe men soqpaq kópirden súrinbei óttik. Eldiń namysy – erdiń namysy. Úzdik úshtikke iliný úshin kásibi sheberligimizdi saldyq».
Aǵa serjant Dýman Baijanov: «Biyl tank biatlonyna qatarynan besinshi jyl bardym. Árine, alǵash qatysqan 2013 jylǵymen salystyrǵanda halyqaralyq jarystyń deńgeii anaǵurlym ósken. Qatysýshy memleket áskerileriniń jaýyngerlik ázirligi de kúsheigeni kórinip tur. Biylǵy dodaǵa Resei, Qazaqstan, Qyrǵyzstan, Qytai, Venesýela, Angola, Belarýs, Iran, Ázerbaijan, Zimbabve, Armeniia, Mońǵoliia, Úndistan, Serbiia, Kýveit, Nikaragýa, Tájikstan, Ýganda, Laos sekildi barlyǵy 19 memleket qatysty. Ózgesheligi sol, bógetter aýysyp, aiyp turaqtary kóbeigen. Óz basym Úndistan, Belorýs, Resei, Qytai tankishileriniń jaqsy daiyndalyp kelgenin baiqadym».
Aǵa serjant Rýstam Moldashev: «Shynyn aitý kerek, birinshi ainalymda jyldamdyqty, ekinshi ainalymda 125 mm 2A46M zeńbireginen 1600 metr, 1700 metr, 1800 metr qashyqtyqta ornalasqan nysanaǵa, úshinshi ainalymda zenittik pýlemetten 900 metr qashyqtyqta ornalasqan 25-shi jáne 11-shi nysanaǵa, tórtinshi ainalymda tankilik Kalashnikov pýlemetinen 600 metr, 700 metr, 800 metr qashyqtyqta ornalasqan 3-shi jáne 9-shy nysanaǵa oqty dál tigizý ońaiǵa túspedi. Finalda da túrli kedergiler qoiylǵan tórt shaqyrymdy úsh márte ainalyp ótý jeńil bolmady. Tank biatlony saiysy – komandalyq jumys qoi. Tank komandiriniń, nysanashy-operatordyń, mehanik-júrgizýshiniń aýyzbirshiliginiń arqasynda jeńiske qol jetkizdik. Ekinshi bolyp márege jetsek te, senbedik. «Tank biatlony – 2017» saiysynyń jeńimpazy dep saltanatty túrde jariialamaǵansha jeńimpaz ekenimizdi sezinbedik. Keýdemizdi qýanysh kernep, elimizge júldemen oraldyq».
