KTK telearnasynyń videosynan kadr
Almaty oblysynda joiqyn jarylys saldarynan bir otbasy úiindi astynda qaldy. Oqiǵa Ile aýdanyna qarasty Ekpindi aýylynda bolǵan, dep habarlaidy Ult.kz KTK arnasyna silteme jasap.
Tańǵy ýaqytta bolǵan dúmpý saldarynan jeke turǵyn úi tolyqtai qirap, úi ishinde bolǵan áiel men onyń úsh uly aýyr jaraqat aldy. Barlyǵy jedel túrde aýrýhanaǵa jetkizilip, dárigerler olardyń jaǵdaiyn turaqty aýyr dep baǵalap otyr. Zardap shekkenderge kúiik, synyq jáne bassúiek-mi jaraqaty diagnozdary qoiylǵan.
Úi iesi Samat Jaiylhanov jarylys kezinde syrtta bolǵan. Onyń aitýynsha, oqiǵa tańǵy saǵat bester shamasynda, uly as daiyndamaq bolǵan sátte oryn alǵan. Gaz qosylyp, sirińke tutandyrylǵan kezde qatty jarylys bolǵan.
Jarylystyń kýási bolǵan azamat birden qiraǵan úige qarai júgirip, úiindi astynda qalǵan jubaiyn ózi shyǵaryp alǵan. Keiin kórshiler kómekke kelip, balalardy qutqarýǵa atsalysqan.
Kýágerlerdiń sózinshe, jarylystyń kúshi sonshalyq — mańaidaǵy úilerdiń terezeleri synǵan. Aýyl turǵyndary gaz qubyrlarynyń turǵyn úilerge tym jaqyn ornalasqanyna alańdaýly.
Oqiǵadan keiin «Almatygazservis-Holding» kompaniiasy jer astyndaǵy gaz qubyrynan aqaý anyqtalǵanyn habarlady. Mamandar gazdyń syrtqa shyǵyp jatqanyn tirkep, apattyq jumystar júrgizgen. Alaida dál osy aqaý jarylysqa sebep boldy ma, joq pa — ázirge naqty aitylmaidy.
Qazirgi ýaqytta oqiǵanyń mán-jaiy jan-jaqty tekserilip jatyr.
Jarylystan keiin baspanadan tek irgetasy ǵana qalǵan. Úi tolyq qirap, jaramsyz kúige túsken.
Aýyl turǵyndary zardap shekken otbasyǵa kómek kórsetýge jumylyp, qarjy jinai bastaǵan. Jergilikti bilik te materialdyq qoldaý kórsetiletinin málimdedi. Resmi málimetke sáikes, ótemaqy alý úshin zardap shekkender úsh ai ishinde ótinish berýi tiis.
