Kúni keshe UBT-dan eń joǵary 140 ball alǵan Shiara Qudaibergenova oqyp bitirgen № 123 mektep-gimnaziianyń direktory Baǵila Áshimbaeva túlek jaily aityp berdi, - dep habarlaidy Tengrinews.kz tilshisi.
Baǵila Áshimbaevanyń aitýynsha, Shiara bul mektepte birinshi synyptan bastap oqyǵan. Jastaiynan bilimge qushtar, izdenimpaz bolyp ósken ol árdaiym mekteptiń qoǵamdyq jumystaryna belsene aralasqan.
"Onynshy synypta Shiara qyzymyz eki ǵana sabaqtan tórttik baǵa alyp qaldy, biraq árdaiym bilimge qushtar boldy. Aýdandyq, qalalyq olimpiadalarǵa qatysyp, talai júldeli oryn alǵan. Debattarǵa da qatysqan, ózi myń buralyp bi de bileidi. Júregi óte keń, imandy, adamgershiligi mol qyz", - deidi mektep direktory.
Munymen qatar, Shiaranyń bar oiy sabaqta bolǵan, mektep direktory onyń tańǵy 4-5-ten turyp, daiyndalatynyn aityp otyr. "Túrli qosymsha sabaqtarǵa bardy, UBT-ǵa asa mán berip daiyndaldy, munda onyń daiyndyǵynyń negizi - qatemen jumys isteý boldy. Osy qatemen jumys isteý ádisi arqyly qyzymyz óte joǵary kórsetkishke qol jetkizip otyr", - deidi Áshimbaeva.
UBT-da Geografiia men Matematika pánderip tańdaǵan Shiara Astanadaǵy Nazarbaev ýniversitetine nemese Gýmilev atyndaǵy ýniversitetine oqýǵa túskisi keledi eken.
"Qazaqstannyń tabiǵatyn, jer qoinaýyndaǵy bailyǵy men ormanyn zerttegisi keletin óte izdenimpaz qyz. Otbasy óte qarapaiym. Joǵary baldy dál bizdiń túlektiń alýyna mektebimizdiń tek sapaly bilimge baǵyttalǵany sebep. Bizde jattandy bilim degen joq, kóbine balanyń logikalyq oilaý qabiletin jetildirip, sol oidy áreketinde, tájiribesinde paidalanýǵa basa nazar aýdaramyz", - dedi Almaty qalasyndaǵy Ahmet Iassaýi atyndaǵy №123 mektep-gimnaziiasynyń direktory Baǵila Áshimbaeva.
Eske salaiyq, keshe, 25 maýsymda almatylyq túlek Shiara Qudaibergenovanyń UBT-dan 140 ball alǵany habarlanǵan edi. Bul málimetti bilim jáne ǵylym vitse-ministri Ashat Aimaǵambetov rastaǵan.
