Dimash Qudaibergenovtiń dosy ári resmi ókili Alpamys Shárimov Instagram áleýmettik jelisiniń tikelei efirinde jas ánshimiz týraly derekti film túsirýdi usyndy, dep habarlaidy Ult.kz tilshisi QazAqparat agenttigine silteme jasap.
«Dimash týraly derekti film túsirýdi usynamyn - onyń Qytaiǵa kelgendigi, osynda ótkizgen ýaqyty jáne «jańa» Dimashtyń paida bolýy týraly. Dostar, qalai oilaisyzdar? Qyzyqty ideialardy usynǵandarmen jumys isteitin bolamyz», - dedi ol.
Astana ýaqytymen túngi saǵat 1-ge deiin jalǵasqan tikelei efir barysynda Shárimov qytailyq jankúier qyzdardyń birqatar hattaryn oqyp berip, ánshi beinelengen portretterdi kórsetti. Ol Instagram-daǵy jazylýshylardyń suraqtaryna jýap bere kele, ózi týraly da birqatar málimetter berip ótti.
Dimashtyń jeke ómirine qatysty kóptegen suraqtar qoiyldy. Oǵan Shárimov: «Dimashtyń basy bos, úilenbegen. Bul taqyrypty jabaiyq», - dep qysqa qaiyrdy.
Aita keteiik, otandasymyz Dimash Qudaibergenovtiń aspan asty elindegi tanymaldylyǵy osy eldegi «Singer 2017» án baiqaýyna qatysýdan bastaldy. Ol baiqaýdyń alǵashqy eki kezeńinde - birinshi, úshinshisinde 3-oryn alyp, miliardtaǵan jurtty óz ónerine tánti etti.
Onyń qytailyq áleýmettik jelidegi jazýshylar sany millionnan asty, oǵan aqyndar óleń-jyrlar arnap, qyzdar qazaqsha úirenip, hattar jazýda. Jankúierler óz paraqshalaryn Dimashtyń sýretterine toltyrýda. Tipti, Qytai dúkenderinde otandasymyzdyń kelbeti beinelengen buiymdar, turmystyq zattar satyla bastady.
Dimashtyń ónerine tánti bolǵan álemge tanymal ánshi Lara Fabian onymen kezdeskisi keletinin aitty. Al kúni keshe ǵana belgili akter, kinorejisser Djeki Chan D.Qudaibergenovti kezdesýge shaqyryp, áńgimelesken bolatyn.
