Astana-Premier Tech-tiń burynǵy bas menedjeri Aleksandr Vinokýrov "Týr de Frans" qarsańynda qyzmetinen shettetilgenine tańǵalǵanyn aitty, - dep habarlaidy Tengrinews portaly RIA Novosti agenttigine silteme jasap
"Shynynda da, meni qyzmetten bosatty. Bul týraly maǵan jyldyń eń mańyzdy jarysy - Týr de Frans-qa birneshe kún qalǵanda jazbasha túrde habarlady. Árine, bul sheshimge tańǵaldym. Velosport - bul búkil ómirim ekenin bári biledi", - dedi Vinokýrov RIA Novostige.
Agenttik málemeti boiynsha, Vinokýrovtyń shettetilýine jeke máseleler sebep bolǵan. Bul týraly L’Equipe basylymynda jazylǵan. Alaida sportshy bul aqparatty joqqa shyǵarady. Onyń aitýynsha, jeke problemalary joq. Resmi habarlamada osy jyly komanda kórsetkishteri tómen bolǵandyqtan, jumystan shyǵarý týraly sheshim qabyldanǵany aitylǵan. Sportshy buǵan kelispeitinin aityp, qazirgi ýaqytta komandanyń qorjynynda 8 - jeńis, 33 podiým bar ekenin eske saldy. "Sonymen qatar, maýsym áli aiaqtalǵan joq jáne shettetilgenge deiin qandai da bir qorytyndy jasaý óte tańǵalarlyq", - dedi ol.
"Men sportshy bola tura óz Otanymnyń atyn shyǵardym, kóp jeńiske qol jetkizdim jáne Qazaqstanǵa eki olimpiadalyq medal (kúmis jáne altyn) ákeldim, keiin jattyqtyrýshy retinde halyqaralyq jarystarda el namysyn qorǵaǵan birneshe medal ielerin ósirdim. "Astana" velokomandasy álemdik arenada Qazaqstannyń bet-beinesine ainaldy. Qazir "Astana" jobasy álemniń úzdik komandalarynyń birine ainalǵan kezde, meni komandadan shettetkeni qynjyltady", - dedi Vinokýrov.
"Qalai bolǵanda da, meni aldaǵy Olimpiada oiyndary qatty alańdatady. Basty úmitimiz Aleksei Lýtsenko komandamen bolǵan barlyq jaǵdaiǵa qarmastan jaqsy daiyndalady dep úmittenemin. Men oǵan Tokioda laiyqty nátije kórsetip, kópjyldyq tarihy bar qazaqstandyq velosporttyń kúshin búkil álemge dáleldeýi úshin jankúier bolamyn", - dep túiindedi ol.
