Keshe Aýǵanstannyń Badahshan provintsiiasyna qarasty Andemin qystaǵynyń 77 turǵyny (sonyń arasynda 26 er adam, 20 áiel jáne 31 bala) tálibter tarapynan tónip turǵan qaýip sebebimen Tájikstan Respýblikasynyń aýmaǵyna ótti. Bul týraly Tájikstannyń Hovar aqparat agenttigi habarlady.
Tájikstan Respýblikasy shekarashylary izgilik pen tatý kórshilik printsipterin basshylyqqa ala otyryp, aýǵan bosqyndaryna/Tájikstan Respýblikasynyń aýmaǵyna ótýine ruqsat berdi.
Qazirgi kezde bosqyndar TR Mýrgab aýdanyndaǵy Kizil-Rabot aýyldyq djamoatynyń Andemin jáne Cheshteba ýchaskeleri aýmaǵyna ornalastyryldy. Bosqyndar ózderimen birge malyn (1000 bas qoi-eshki, 300 qodas, 3 túie jáne 30 jylqy) aidap ákelgen.
«Atalǵan shekara ýchaskelerindegi jaǵdai Tájikstan Respýblikasy shekarashylarynyń baqylaýynda», - delingen Tájikstan Respýblikasy MUQK Shekara qyzmetiniń baspasóz ortalyǵy taratqan málimdemede.
Eske salsaq, Aýǵanstandaǵy jaǵdai kúrdelenip Aýǵanstannyń qarýly áskerileri Ózbekstan men Tájikstan aýmaǵyna ótip ketken edi. «Taliban» qozǵalysy Aýǵanstandaǵy kóptegen jerlerdi basyp aldy.
Sondai-aq, Tájikstan Aýǵanstanmen shekarany nyǵaitý úshin 20 myń sarbazdy áskerge shaqyrmaq.
