Senbi kúni tálipter (Qazaqstan aýmaǵynda tyiym salynǵan - avt.) Aýǵanstannyń Ózbekstanmen shekaralas Balh aimaǵynyń ortalyǵy, eldegi tórtinshi iri qala – Mazari-Sharifti baqylaýyna aldy, dep habarlaidy Azattyq.
Áleýmettik jelide taraǵan videodan Ámýdariia ózeni arqyly ótetin avtokólik jáne temirjol ótkeli – Dostyq kópirinde kóp kóliktiń jinalyp turǵany baiqalady. Bul ótkel Aýǵanstannyń Hairaton qalasy men Ózbekstannyń Termez shaharyn jalǵap jatyr. Kei derekter boiynsha bul – aýǵan úkimet áskeriniń jáne tegi ózbek general Abdýl Rashid Dýstým ókilderiniń kólikteri. Olar Mazari-Shariften qashyp shyǵyp, Ózbekstannan pana suraǵan bolýy múmkin.
Resmi Tashkent Aýǵanstanmen shekaradaǵy jaǵdai boiynsha eshqandai málimdeme jasaǵan joq.
Balh aimaǵynyń burynǵy gýbernatory Ato Muhammad Nur Twitter-degi paraqshasynda úkimet áskeriniń Mazari-Sharifti esh uryssyz bosatyp bergenin rastady. Onyń aitýynsha, tálipter aimaqty astyrtyn áreket nátjesinde basyp alǵan.
"Batyl qarsylyqqa qaramastan, uiymdasqan, aýqymdy ári qorqaý áreket kesirinen barlyq úkimet nysandary men kúshteri tálipterge berildi. Olar astyrtyn áreket arqyly meni jáne marshal Dýstýmdy qolǵa túsirmek boldy, biraq bul oiy júzege aspady" dep jazdy Ato Muhammad Nur.
Azattyqtyń Ózbek qyzmetiniń habarlaýynsha, kei aqparatqa qaraǵanda, general Dýstým Ózbekstan shekarasyn kesip ótken, al Aýǵanstan prezidenti Muhammed Ashraf Ǵani úkimetiniń sheneýnikteri Ózbekstan basshylarynan pana suraǵan. Alaida bul aqparat resmi túrde rastalǵan joq.
400 myńdai turǵyny bar Mazari-Sharif – kólik pen saýda joldary toǵysqan mańyzdy qala. Balh aimaǵynyń soltústigindegi bul shahar men Ózbekstannyń Termez qalasynyń arasy 58 kilometr.
Tegi ózbek Abdýl Rashid Dýstým – Aýǵanstannyń beligi áskeri ári saiasi qairatkeri. Ol 1990 jyldardaǵy tálipterge qarsy soǵysta erekshe ról oinaǵan. Batys qoldaǵan Hamid Karzai bilikke kelgen soń Dýstým Aýǵanstan úkimetinde joǵary laýazymdy qyzmetter atqarǵan.
