Tálipter AQSh pen NATO-ǵa járdemdesken Aýǵanstan adamdaryn izdeýge belsene kiristi. Birikken ulttar uiymynyń málimetin VVS men New York Times jariialady.
Bul aqparatqa qaraǵanda, tálipter qolynda amerikalyqtarmen jumys istesken adamdardyń tizimi bar, olar sol tizimdegi adamdardy taýyp, jazaǵa tartqysy keledi. Eger adamnyń ózi tabylmasa, onyń týysyn qamaýǵa alamyz, bolmasa óltiremiz dep qorqytady. Ásirese, bilikten taidyrylǵan úkimettiń áskeri qyzmetkerleri men tergeý organdarynda jumys istegen politseilerge qaýip kúshti. Qazir Aýǵanstannan ketip qalý úshin Kabýl áýejaiyna umtylǵan adamdardyń kóbi sol tizimde tur.
Tálipter jýrnalisterdi de izdestirip jatyr. Olar Aýǵanstannyń batysynda Deutsche Welle basylymy jýrnalisiniń bir týysyn óltirip, ekinshisin aýyr jaralaǵan. Bul jóninde Germaniianyń medikompaniiasy habarlady. Bul aqparatqa qaraǵanda, tálipter Germaniiaǵa ketip qalǵan jýrnalisti izdep barǵan. Onyń ózge týystary sońǵy sátte qashyp úlgerip, jasyrynyp qalǵan.
DW málimetinshe, Kabýl men provintsiialarda tálipter osy kompaniianyń kemi úsh qyzmetkeriniń úiin tintigen. Germaniia buqaralyq aqparat quraldary úkimetke ashyq hat jazyp, Aýǵanstanda nemis basylymyna jumys istegen jýrnalisterdi otbasylarymen qosa dereý áketetin baǵdarlama jasaýǵa shaqyrdy.
Facebook Aýǵanstandaǵy paidalanýshylaryn "dostardy qaraý" fýnktsiiasynan ajyratty. Áleýmettik jelidegi kiberqaýipsizdik bóliminiń basshysy Nataniel Gleiher Twitter arqyly munyń "adamdardy qýǵyn-súrginnen qorǵaý úshin" jasalǵanyn aitty.
"Taliban" qozǵalysy 15 tamyzda Kabýldy soǵyssyz alǵan soń, Aýǵanstannyń búkil aýmaǵyna baqylaý ornatqanyn, Aýǵanstan islam ámirligin quratynyn málimdegen.
"Taliban" 1996 jyldan 2001 jylǵa deiin Aýǵanstannyń basym bóliginde bilik etken. 2001 jyly Niý-Iorktegi terrordan soń AQSh pen onyń odaqtastary Aýǵanstan aýmaǵyna kirip, tálipter burynǵy biliginen aiyrylǵan edi. Olar AQSh áskeri Aýǵanstannan shyǵarylar qarsańda qaita belsenip, iri qalalardy shapshań basyp alǵan.
