Aýǵanstan biligi men «Taliban» ókilderi arasynda kelissózder júrgizildi. Onda talibanshylar Aýǵanstan túremelerindegi 7 myń jaqtasyn shyǵarǵan jaǵdaida, atysty úsh aiǵa toqtatatynyn málimdedi, dep habarlaidy The National News.
Bul usynys týraly beisenbi kúni aýǵan kelissózge qatysqan úkimetiniń ókili Nader Naderi habarlady.
«Bul – úlken talap», - dedi Naderi. Onyń aitýynsha, oǵan qosa, kóterilisshiler Taliban kóshbasshysyn BUU-nyń qara tiziminen alyp tastaýdy talap etken.
Bul kezde talibter aýǵan provintsiialaryna basqynshylyq jasap, negizgi marshrýttar boiyndaǵy qalalardy, sonymen qatar saýda úshin asa mańyzdy shekara ótkelderin basyp alýda. Jergilikti turǵyndardyń aitýynsha, 13 shilde kúni olar Pákistanmen shekaradaǵy Spin-Boldak-Chaman shekara ótkelin basyp alǵan.
Degenmen beisenbi kúni Qabýldyń resmi ókilderi úkimet áskeriniń talibter ýaqytsha jaýlap alǵan Spin-Boldak-Chamandy qaitadan óz baqylaýyna alǵanyn málimdedi, dep habarlaidy Reuters.
Qandaǵar óńiri ákimshiliginiń sheneýnigi Taliban jaýyngerleriniń bul aýdandaǵy aýǵan qaýipsizdigi kúshterinen asyp túsetinin eskertedi.
Bul oraida, Talibannyń resmi ókili Zabihýlla Mýdjahid aýǵan úkimeti taratqan shekara ótkelin qaita óz baqylaýyna alǵany týraly aqparatty joqqa shyǵardy.
«Bul – Qabýl ákimshiliginiń nasihaty men negizsiz málimdemesi», - dedi Taliban ókili. Onyń aitýynsha, talibandyq ásker áli kúnge deiin shekara ótkelin ustap tur.
Sol arada, BUU-nyń Bosqyndar isteri jónindegi Joǵary komissar basqarmasy (BJKB) Aýǵanstanǵa kele jatqan gýmanitarlyq daǵdarys týraly eskertti. Ol, óz kezeginde, bosqyndardyń jappai kórshi elderge qashýyna ákelýi múmkin.
Qazirgi kezde diplomatiialyq kúshter Qatarda ótip jatqan kelissózderde aýǵan biligi men Talibandy atysty toqtatýǵa itermeleýge jumyldyrylǵan. Búgin Aýǵanstannyń prezidenti Ashraf Gani Tashkentte ótip jatqan «Orta aziia elderi – AQSh» S5+1 formatyndaǵy kezdesýde óńirlik kóshbasshylarmen kezdespek.
Eske salsaq, Aýǵanstandaǵy jaǵdai kúrdelenip Aýǵanstannyń qarýly áskerileri Ózbekstanmen Tájikstan aýmaǵyna ótip ketken edi. «Taliban» qozǵalysy Aýǵanstandaǵy kóptegen jerlerdi basyp aldy. Sondai-aq, Tájikstan Aýǵanstanmen shekarany nyǵaitý úshin 20 myń sarbazdy áskerge shaqyrmaq.
