Aýǵanstannyń tálipter qurǵan úkimet tóraǵasynyń orynbasary Tájikstannan Aýǵanstannyń ishki isine aralaspaýyn surap, áitpese "túrli jaǵdailar bolýy múmkin" dep eskertti. Bul týraly "Azattyq" habarlady.
Tájikstan biligi bul málimdemege ázirge jaýap bergen joq. Munyń aldynda tájik prezidenti Emomali Rahmon Tájikstan Aýǵanstannyń ishki isine aralaspaidy, alaida kórshi eldegi jaǵdaidy retteý úshin inkliýziv úkimet qurylýy kerek dep málimdegen.
"Taliban" qozǵalysy (Qazaqstanda tyiym salynǵan uiym) qurǵan úkimet tóraǵasynyń orynbasary Ábdisalam Hanafi 26 qyrkúiekte Al Jazeera telearnasyna bergen suhbatynda bilik Tájikstannan Aýǵanstannyń ishki isine aralaspaýyn suraidy dep aitqan. Hanafi Tájikstannyń naqty qai isine aralasqanyn aitpaǵan, degenmen ol prezident Rahmonnyń tálipterdi birneshe márte synaǵanyn meńzese kerek.
Al Jazeera telearnasyna bergen suqbatynda Hanafi Aýǵanstannyń Tájikstanmen qarym-qatynasy jaqsy bolǵanyn qalaitynyn aitty.
"Bir eldiń kórshisiniń ishki isine aralasýy eshkimge abyroi ápermeidi. Árbir árekettiń saldary bolady. Árkim óz úiinde tártip ornatqany durys bolar edi", - dep málimdedi ol.
Aýǵanstanǵa kórshi elder táliptermen bailanys ornatýǵa talpynyp jatyr, tek Dýshanbe ǵana Aýǵanstandaǵy jańa úkimetti moiyndamaitynyn ashyq málimdegen.
