"Taliban" qozǵalysynyń (Qazaqstanda tyiym salynǵan) jetekshileri Tájikstanmen barlyq kelispeýshilikti saiasi-diplomatiialyq jolmen sheshýge daiyn ekenin jetkizdi. Tájikstan biligi ázirge bul málimdemege jaýap bermedi, dep habarlaidy Azattyq.
Tálip úkimetiniń mádeniet jáne aqparat ministri Rýhýlla Omar Tolo TV arnasyna suqbatynda Tájikstandy "jaqsy kórshi" dep atady.
"Syrtqy ister ministrligi barlyq eldermen bailanys ornatyp jatyr. Biz bárimen jaqsy qarym-qatynasta bolǵymyz keledi. Tájikstan biligimen barlyq másele boiynsha kelissóz júrgizemiz", - dedi ol.
Ol sonymen birge tálip úkimeti Aýǵanstan aimaǵyn ózge elge shabýyl jasaý úshin paidalanýǵa jol bermeitinin aitqan.
Rýhýlla Omardyń málimdemesi Tájikstan prezidenti Emomali Rahmon men Pákistan premer-ministri Imran Han telefon arqyly sóileskennen keiin jariialandy. Emomali Rahmon onda Aýǵanstanmen dialog júrgizýdiń mańyzdy ekenin atap ótken.
Ozodi radiosynyń derekkóziniń málimetinshe, Tájikstan biligi tálipterge "Ansorýllah" sodyrlary Darvaz aýmaǵynan ketken kezde ǵana, eki el shekarasyndaǵy Rýzvai-Nýsai kópirin ashamyz dep eskertken.
"Taliban" qozǵalysy Aýǵanstan biligin basyp alǵannan keiin, resmi Dýshanbe tálipterdiń atyna birneshe ret syn aitqan. Al tálipter muny ishki isimizge aralasty dep baǵalaǵan.
