Taliban sodyrlary men Batys qoldaǵan Aýǵanstan úkimeti arasyndaǵy qaqtyǵys kúsheiip, tálipter taǵy bir aimaqty basyp aldy, bul AQSh bastaǵan halyqaralyq kúshter qyrkúiekte ketken soń eldiń bolashaǵy qalai bolady degen suraqty kúsheite tústi.
11 maýsymda jergilikti keńestiń úsh múshesi sodyrlar Soltústik Tahar provintsiiasyndaǵy strategiialyq mańyzdy Ishkimish aimaǵyn basyp alǵanyn habarlady.
Keshegi qarqyndy shaiqastan keiin úkimet kúshteriniń oq-dárisi taýsylyp, áýe qoldaýy bolmai qalǵandyqtan, jeńilis tapqan.
Ishkimish taǵy tórt aimaqty baqylaýǵa múmkindik beretin mańyzdy jol toraby retinde qarastyrylady, endi Taliban sol óńirlerge qaýip tóndirýi múmkin.
1 mamyrda Amerika Qurama Shtattary men NATO-nyń basqa músheleriniń áskeri shyǵaryla bastaǵannan beri Aýǵanstandaǵy birneshe aýdan Taliban qolyna ótti.
Aýǵan sheneýnikteri osy aptada Taliban Ýrýzgan jáne Badgis provintsiialaryndaǵy úsh aýdandy baqylaýǵa aldy dep málimdedi.
11 maýsymda aýǵan sheneýnikteri sońǵy 24 saǵat ishinde Paktiia, Gor, Lagman jáne Nangarhar provintsiialarynda "Taliban" qozǵalysynyń keminde 89 sodyry qaza tapty dep málimdedi.
Lagman politsiiasy 11 maýsymdaǵy túngi shaiqasta Taliban komandiri Badrýddindi atyp óltirgenin habarlady.
Taliban aýǵan úkimetiniń málimdemesine qatysty pikir aitqan joq.
Úkimet te, Taliban da qarsy tarapta kóp shyǵyn boldy dep jii aitady, biraq aqparatty táýelsiz derekkózden tekserý múmkin emes.
Urys kúsheigen kezde sheteldik kúshterdiń ketýi Kabýldaǵy úkimettiń quldyraýyna jáne Talibannyń bilikke oralýyna ákelýi múmkin degen boljam bar.
Burynǵy prezident Donald Tramptyń basshylyǵymen 2020 jylǵy aqpanda jasasqan kelisimge sáikes, AQSh pen NATO-nyń barlyq kúshteri 1 mamyrǵa deiin Aýǵanstannan ketýi tiis edi.
AQSh prezidenti Djo Baiden ásker shyǵarýdyń logistikalyq máselelerin alǵa tartyp, sarbaz áketýdi qyrkúiekke shegerdi.
Osy aptada AQSh ortalyq komandovaniesiniń basshysy general Kennet Makkenzi Aýǵanstannan ásker shyǵarý operatsiiasynyń shamamen jartysy aiaqtalǵanyn jáne protsestiń "óte jaqsy júrip jatqanyn" aitty.
AQSh bul protsess barysynda 2 500 sarbazdy, 16 000 kelisim-shartpen kelgen soldatty jáne júzdegen tonna jabdyqty alyp ketýi kerek.
Jabdyqtyń bir bóligi joiylady nemese aýǵan kúshterine beriledi.
Túrkiianyń Aýǵanstanda 500-den astam sarbazy bar, olar aýǵan qaýipsizdik kúshterin oqytyp jatyr.
Taliban – 1990 jyldary qurylǵan asa radikal dini-saiasi qozǵalys. Olar shariǵat negizindegi islam memleketin qurýdy jaqtaidy. 1996-2001 jyldary Taliban Aýǵanstanda bilik qurdy, biraq olardy halyqaralyq qaýymdastyq moiyndamady.
